နွေတမာန်- ထောင်ထွက်ချာလီ (၀တ္ထုတို)

နွေတမာန်

ထောင်ထွက်ချာလီ

ချာလီ့ကိုတွေ့ရမြင်ရသည်မှာ ယခင်ကလိုမဟုတ်တော့ပါ။ ချာလီ့ဘ၀သည် လွန်ခဲ့သောကာလများကနှင့် များစွာခြားနားသွားပါပြီ။

ယခုအခါတွင်… ချာလီ့ကို ကျွန်တော်တို့တစ်ရပ်ကွက်လုံးက ဘီးတပ်ကုလားထိုင်ပေါ်တွင်သာ တွေ့မြင်နေရတော့သည်။ ချာလီသည် မည်သူ့ကို မှမမှတ်မိတော့။ သူ့မိဘ၊ သူ့ညီအစ်ကိုမောင်နှမ၊ သူ့အိမ်သားများကိုပင် မှတ်မိပုံမပေါ်တော့ပါ။

ချာလီ၏ခန္ဓာကိုယ်သည် ဘီးတပ်ကုလားထိုင်ပေါ်တွင် ပျော့ခွေလျှက်ရှိသည်။ ဘီးတပ်ကုလားထိုင်ကို တစ်ယောက်ယောက်က တွန်းပေးရသည်။ ချာလီသည် ဘီးတပ်ကုလားထိုင်နှင့် ညနေတိုင်း အိမ်ရှေ့ကိုထွက်လာတတ်၏။ သူ့ဖခင်အစီအစဉ်အရ… အိမ်ရှေ့သစ်ပင်ရိပ်တွင် ချာလီထိုင်နေသော ဘီးတပ်ကုလားထိုင်ကို ရပ်ထားကာ ချာလီ့ကိုစိတ်အပန်းဖြေစေခြင်းဖြစ် သည်ဟုဆိုပါသည်။

သို့သော်… ချာလီကတော့ အိမ်ရှေ့မှဖြတ်သွားသူများက သူ့ကို နှုတ်ဆက်သော်လည်း မသိ၊ မမှတ်မိ။ ကြာတော့… ဘယ်သူကမှ ချာလီ့ကို နှုတ်မဆက်တော့ပေ။

ချာလီ့အပေါင်းအသင်းသူငယ်ချင်းများသည်လည်း ချာလီသည်ဘ၀ ရောက်ခါစက လာကြသေးသည်။ ချာလီက သူတို့ကို မမှတ်မိတော့သည့်အခါ တဖြည်းဖြည်းအလာကျဲသွားသည်။ ခုတော့… ဘယ်အပေါင်းအသင်းမှ ချာလီ့ ဆီမလာကြတော့ပါ။

ချာလီက လမ်းသွားလမ်းလာများ၊ လမ်းမှာဆော့ကစားနေသည့် ကလေးသူငယ်များကို ငေးကြည့်နေတတ်သည်။ သူ့ပါးစပ်သည် အမြဲပွင့် နေသည်။ သူ့ပါးစပ်ထဲမှ သားရေများအမြဲစီးကျနေသည်။

ချာလီ့လက်များခြေများက ကောက်ကွေးနေလေပြီ။

ချာလီသည် အသိမရှိတော့သည်သာ မဟုတ်။ စကားလည်း မပြောတော့ပြီ။ နားလည်းမကြားတော့ပြီ။

ချာလီ့အဖြစ်ကိုကြည့်ရသည်မှာ ရင်နာစရာကောင်းလှပေ၏။

လွန်ခဲ့သောတစ်နှစ်ကပင် ချာလီသည် ဤသို့သောအသွင်အပြင် မျိုးမဖြစ်သေး။ ဒီလိုဘ၀မျိုးကိုမရောက်သေး။

ချာလီ့ကိုကြည့်လိုက်လျှင် အမြဲတမ်းတက်ကြွနေသည်။ လန်းဆန်း နေသည်။ ချာလီသည် ရုပ်ရည်ချောမောသောလူငယ်လေးတစ်ယောက်ဖြစ် သည်။ အဝတ်အစားကို သပ်သပ်ရပ်ရပ်ဝတ်တတ်သည်။ လှအောင်လည်း ဝတ်တတ်သည်။ သူဌေးသားမို့ အဖိုးတန်အဝတ်အစားတွေလည်း အများ အပြားရှိပါသည်။

မိန်းကလေးများက ချာလီ့ကိုငေးကြည့်ရသည်။ ချာလီ့ကိုတစ်ဖက်သတ်နှစ်သက်နေသောမိန်းကလေးတွေ ဤလမ်းထဲမှာပင် အများအပြားရှိ ပါသည်။

ယခင်က ချာလီ့ဓာတ်ပုံများကိုပြ၍… လက်ရှိချာလီနှင့်နှိုင်းယှဉ်ကြည့် ခိုင်းလျှင် မသိသူများက လူတစ်ယောက်စီဟုပင် ပြောကြပေမည်။ တစ် ယောက်တည်းဆိုသည်ကို ယုံကြည်ကြမည်မဟုတ်ပေ။ ချာလီသည် ထိုမျှထိ ဆန့်ကျင်ဖက်ပြောင်းလဲသွားခဲ့ခြင်းဖြစ်ပါသည်။

ဟိုတုန်းက မော်တော်ဆိုင်ကယ်လေးတဝီဝီဖြင့် လမ်းတကာလည် ကာ ကျော့ကျော့မော့မော့လေးနေခဲ့သောချာလီ။ ထောင်ထွက်ချာလီဆိုသည့် နာမည်ကို ရခဲ့သည့်ချာလီ။

မော်တော်ဆိုင်ကယ်စီးရာတွင် ကျွမ်းကျင်လှသောကြောင့် ချာလီသည် ]]ထောင်ထွက်ချာလီ}}ဟုပင် အခေါ်ခံခဲ့ရလေသည်။

_____

ထောင်ထွက်ဆို၍ အကျဉ်းထောင်၊ အချုပ်ထောင်ထဲက ထွက်လာ သူလို့ မထင်လိုက်ကြပါနှင့်။

ကျွန်တော်တို့မန္တလေးသည် မော်တော်ဆိုင်ကယ်မြို့တော်ဖြစ်သည်။ ယခင်က စက်ဘီးမြို့တော်ဟုတင်စားခဲ့ကြသည်။ ယခုတော့ ဆိုင်ကယ်မြို့တော် ဖြစ်နေပါပြီ။ မော်တော်ဆိုင်ကယ်ပေါလှသလို ဆိုင်ကယ်စီးသူအားလုံးကလည်း အစီးကျွမ်းကျင်ကြပေသည်။ ထိုအထဲမှာ တချို့လူငယ်များက သူတကာထက် ပိုကဲကာ မော်တော်ဆိုင်ကယ်ကို ပုံစံအမျိုးမျိုးအဖုံဖုံဖြင့် စွန့်စွန့်စားစား စီးတတ်ကြပြန်သေးသည်။

ဆိုင်ကယ်ကို မောင်းသူထိုင်ခုံပေါ်ကမဟုတ်ပဲ နောက်ကယ်ရီယာ ခုံပေါ်မှာထိုင်၍ စီးခြင်း၊ မတ်တပ်ရပ်၍စီးခြင်း၊ ပက်လက်လှန်အိပ်၍စီးခြင်း၊ ဆိုင်ကယ်ရှေ့ဘီးကို မိုးပေါ်ထောင်၍စီးခြင်းတို့ ဖြစ်ပါသည်။

ချာလီသည် ဆိုင်ကယ်ရှေ့ဘီးကို မိုးပေါ်ထောင်စီးရာတွင် အထူး ကျွမ်းကျင်သည်။ အိမ်မှထွက်လျှင်ပင် သမားရိုးကျမထွက်။ လီဗာကို တအား ကုန်တင်ကာ ရှေ့ဘီးကိုထောင်၍ထွက်သည်။

ရှေ့ဘီးထောင်၍ ဆိုင်ကယ်ထွက်ရာတွင် ကျွမ်းကျင်လွန်းသော ကြောင့် ချာလီ့ကို ]]ထောင်ထွက်}}ဟု ဘွဲ့ပေးကြခြင်းပင်ဖြစ်ပါသည်။

            _____

ညအချိန်ဆိုလျှင် ကျုံးနဘေး၌ ဆိုင်ကယ်ကိုစတန့်အမျိုးမျိုးလုပ်စီး သူများကို တွေ့ရနိုင်ပါသည်။ ထိုအထဲတွင် ဆိုင်ကယ်ရှေ့ဘီးကိုထောင်စီး သည့် ချာလီသည်လည်း တစ်ယောက်အပါအဝင်ဖြစ်ပါ၏။

မိုးသည်းသောညများမှအပ ကျုံးနဘေး၌ ဆိုင်ကယ်ထောင်စီးသူ အများအပြားတွေ့ရတတ်ပေသည်။ ကျုံးတောင်ဖက်ခြမ်းဖြစ်သော ၂၆ဘီ လမ်းအနောက်ဖက်ခြမ်း၊ ကျုံးမြောက်ဖက်ဖြစ်သော ၁၂လမ်းအနောက်ဖက် ခြမ်း တိရစ္ဆာန်ရုံရှေ့များတွင် ဆိုင်ကယ်သမားလူငယ်အချင်းချင်းချိန်းကာ ဆိုင်ကယ် ထောင်စီးပြိုင်ကြသည်။

ဘေးမှကြည့်သူများအတွက်တော့ အသည်းယားစဖွယ်ဖြစ်ပေ၏။ ကိုယ့်ကိုလာပြီး ထိခိုက်မိမှာ တိုက်မိမှာစိုး၍ ဝေးဝေးကကွင်းရှောင်သူမရှား ချေ။ လူငယ်တွေကတော့ သူတို့စတန့်လုပ်စီးသည်ကို ဂုဏ်အယူကြီးယူကာ အမျိုးမျိုးလုပ်ပြနေတတ်ကြပြန်သည်။

အိတ်ဇောကိုဖြုတ်ထား၍ အသံကလည်း နားမခံသာအောင် ကျယ် လောင်နေတတ်သည်။

ချာလီက ထိုနေရာတွေအားလုံးကို ညတိုင်းရောက်သည်။ ဆိုင်ကယ် ထောင်စီးရာတွင် ချာလီ့ကိုဘယ်သူမှမမီ။ ထို့ကြောင့်လည်း ထောင်ထွက်ချာလီ ဟု နာမည်ရခဲ့ခြင်းဖြစ်ပါသည်။

ချာလီကလည်း ထောင်ထွက်ဘွဲ့ကို ဝမ်းပန်းတသာခံယူသည်။ ထောင်ထွက်ဘွဲ့ကပင် သူ့ကိုမကောင်းကျိုးပေးခဲ့သလားမသိပါ။

အားပေးအားမြှောက်လုပ်ပြီးပေးထားသောနာမည်လေးကရှိနေတော့ ထိုနာမည်၏ဂုဏ်ပုဒ်ကိုထိမ်းသိမ်းရမည့်တာဝန်ရှိသည်ဟု မှတ်ယူပုံရပေသည်။ ချာလီသည် နေရာမရှောင်၊ အချိန်မရှောင် သူ၏ဆိုင်ကယ်ထောင်စီးခြင်း အစွမ်းအစကိုပြလေတော့သည်။

မြွေအလမ္မါယ်ဆရာ မြွေကြောင့်သေရတယ်ဆိုတဲ့စကားနဲ့ ဥပမာ ပြရမည်လားမသိပါ။

နေရာမရှောင်၊ အချိန်မရွေး ဆိုင်ကယ်ထောင်စီးလေ့ရှိသောချာလီ၊ တစ်နေ့တော့ ဒုက္ခတွေ့လေသည်။

ဖြစ်မယ့်ဖြစ်တော့ လူငယ်အချင်းချင်းပြိုင်စီးသည့်နေရာတွင် မဖြစ်။ လူရှုပ်သောလမ်းမပေါ်မှာဖြစ်ခြင်းမဟုတ်။

တစ်နေ့တွင် ညဖက်ဆိုင်ကယ်အပြိုင်စီးပြီးပြန်အလာ…

ဘီယာသောက်လာခဲ့သည်ဟု နောက်ပိုင်းတွင်သိရသည်။ လူကလည်း သွေးကြွနေသည်ထင်ပါသည်။

အိမ်ရှိရာလမ်းထဲသို့ချိုးအကွေ့တွင် အရှိန်ကိုမလျှော့ပဲ လီဗာကို တအားကုန်ဆွဲကာ ရှေ့ဘီးကိုမိုးပေါ်ထောင်လိုက်သည်။

ထိုနေ့က ညဆယ်နာရီလောက်ကြီး အိမ်ထဲမှာရှိနေသူများပင် ချာလီ့ဆိုင်ကယ်သံကိုကြားလိုက်ရပါသည်။

လီဗာမြှင့်သံ၊ အိတ်ဇောကိုဖြုတ်ထား၍ ကျယ်လောင်စွာမြည်သော အသံ တို့နှင့်အတူ ဝုန်းကနဲလဲပြိုလိုက်သောအသံကြီး။

တစ်လမ်းလုံးမှာရှိသမျှလူတွေ အိမ်ထဲကပြေးထွက်လာကြသည်။

အိတ်ဇောဖြုတ်ထားသော ဆိုင်ကယ်သံကြောင့် ချာလီပဲဆိုတာလည်း တစ်လမ်းလုံးက သိနေကြသည်။

ချာလီ့အိမ်ကလူများလည်း အစေအပါးကမကျန် အားလုံးပြေးထွက် လာကြလေ၏။

လမ်းပေါ်ကမြင်ကွင်းကိုကြည့်လိုက်တော့ ချာလီ့ဆိုင်ကယ်က စက် မရပ်သေးပဲ နောက်ဘီးလည်ကာ လမ်းပေါ်တွင်လဲနေသည်။ ချာလီကိုယ်တိုင် လည်း ဆိုင်ကယ်နှင့်မလှမ်းမကမ်းတွင်လဲနေသည်။

ဆိုင်ကယ်ကိုထောင်အစီး လမ်းဘေးက ထနောင်းပင်အိုကြီးအနီးတွင် လမ်းလမ်းခေါင်၌ကျနေသော ခဲလုံးကြီးတစ်လုံးကိုတိုက်မိခြင်းဖြစ်သည်။ ဘီးတစ်ဘီးထဲဖြင့် ဟန်ချက်ပြုထားစဉ်မှာ ခဲလုံးကိုနင်းမိလိုက်တော့ ဟန်ချက်ပျက်သွားသည်။ ဆိုင်ကယ်က လည်ထွက်ကာ ထနောင်းပင်ကို ဝင်တိုက် မိခြင်းဖြစ်သည်။

ဘယ်လောက်အရှိန်ပြင်းလည်းတော့မသိ။ အလွန်တရာမာကျောသောသံထည်ဖြင့်ပြုလုပ်ထားသော ဆိုင်ကယ်ရှေ့ဘီးမှာ ကောက်ကွေးသွား သည်။

စက်လည်နေဆဲဖြစ်သောဆိုင်ကယ်ကို ကျွန်တော်က သော့ဖြုတ်၍ ရပ်အောင်လုပ်ပေးလိုက်ရသည်။

ချာလီကတော့ လမ်းမပေါ်လဲနေရာမှ ထမလာတော့။

ချာလီ့အစ်မများ၊ ညီမများ၏ အော်ငိုသံက ပတ်ဝန်းကျင်ကိုလွှမ်းသွားသည်။ ချာလီ့ကို တစ်လမ်းလုံးကခင်မင်ကြ၍ အားလုံးလည်း စိတ်မ ကောင်းဖြစ်ကြသည်။

ချာလီတို့အိမ်ကကားနှင့်ပင် ဆေးခန်းကိုပို့ရသည်။

ယာဉ်တိုက်မှုဖြစ်ရုံမက၊ ချာလီ့ဒဏ်ရာများကဆိုးလွန်း၍ ပြင်ပဆေးခန်းကြီးက လက်မခံ။ ဆေးရုံကြီးအရေးပေါ်ဌာနကို သွားရလေသည်။

ထိုအချိန်မှစ၍ ချာလီဆိုသော ထောင်ထွက်ဘွဲ့ပိုင်ရှင်လူငယ်ကို လူကောင်းတစ်ယောက်အဖြစ် မတွေ့ရတော့သည်မှာ ယနေ့အထိပင်ဖြစ် တော့သည်။

_____

ဆိုင်ကယ်တိုက်မိသည့်အရှိန်မှာ ပြင်းထန်လွန်းလှ၍ ချာလီသည် လူကောင်းပြန်ဖြစ်မလာတော့ပေ။

အာရုံကြောများထိခိုက်သွား၍ မှတ်ဉာဏ်ချွတ်ယွင်းသွားသည်။ အကြောများသေသွားသည်။ ခြေတွေလက်တွေလှုပ်လို့မရတော့။ တစ်ကိုယ် လုံးလှုပ်လို့မရတော့။ စကားပြောလို့လည်း မရတော့။ နားလည်းကြားပုံ မရတော့ပေ။ ချာလီသည် အသက်ရှင်ရက်မှ လူ့လောကကြီးနှင့် အဆက် အသွယ်ပြတ်တောက်သွားလေသည်။

 ချာလီ့မိဘများမှာ ချမ်းသာကြွယ်ဝသူများဖြစ်သည်။ ဈေးချိုအနီးရှိ ကိုယ်ပိုင်လေးထပ်တိုက်ကြီးတွင် ကုန်မာဆိုင်ဖွင့်ထားသော သူဌေးများဖြစ် သည်။ လေးထပ်တိုက်ကို ဆိုင်ခန်းအဖြစ်သာသုံးသည်။ နေတော့ ဆိတ်ငြိမ် သူဌေးရပ်ကွက်မှာနေသည်။

တတ်န်ိုင်သူများမို့ ချာလီ့ကို နိုင်ငံခြားပို့ ဆေးကုဖို့အထိ ကြိုးစား ခဲ့သေးသည်။ မည်သို့မျှပြန်မကောင်းနိုင်တော့ဆိုသော ပါရဂူကြီးများ၏ မှတ်ချက်ကြောင့်သာ လက်လျှော့လိုက်ရခြင်းဖြစ်သည်။

ခုတော့… ချာလီသည် ဘီးတပ်ကုလားထိုင်ပေါ်တွင် အသိမဲ့စွာ အရုပ်ကြိုးပြတ်ဟန်ဖြင့်ရှိနေတော့သည်။ အညစ်အကြေးကိုလည်း သူများ က လုပ်ပေးရသည်။ အစားအသောက်ကိုလည်း သူများခွံ့ကျွေးမှစားနိုင်တော့ သည့်ဘ၀။ ပါးစပ်ကသွားရည်ကိုလည်း မထိန်းနိုင်တော့။ ခြေလက်များမှာ တဖြည်းဖြည်းကောက်ကွေးလာခဲ့သည်။

သို့သော်… ထိုမျှလောက်ကြီး မသန်မစွမ်းဖြစ်သွားသော်လည်း အစားအသောက်ကိုတော့ ချာလီက စားနိုင်သည်။ အစားအသောက်ကို ဝူးဝူးဝါးဝါးအော်၍တောင်းသည်။ အနီးတွင်စားစရာသောက်စရာမြင်လျှင် မသန်တော့သောလက်ဖြင့် တုန်ချိစွာပြကာ အစာကိုတောင်းသည်။ အရည် လည်နေသောမျက်လုံးကြီးများဖြင့် အစားအသောက်ကို မျက်တောင်မခပ် တမ်းကြည့်နေတတ်သည်။

ချာလီ့အဖြစ်က ဆိုင်ကယ်အစီးကြမ်းသည့်လူငယ်များ သံဝေဂ ယူလောက်သည့်အဖြစ်ပင်ဖြစ်တော့သည်။

_____

ရပ်ကွက်ထဲမှ ရှေးရိုးဆန်သည့်လူကြီးသူမများအတွက်တော့ ချာလီ့အဖြစ်ကို အမြင်တစ်မျိုးဖြင့် မြင်ကြလေသည်။

ချာလီဝင်တိုက်ခဲ့သောထနောင်းပင်ကြီးမှာ ရာဇဝင်ရှိသောသစ်ပင်တစ်ပင်ဖြစ်လေသည်။

ချာလီဆိုင်ကယ်ဖြင့်ဝင်တိုက်မိသည်မှာ ထိုထနောင်းပင်ကြီးဖြစ်နေ၍ အထင်အမြင်များ အမျိုးမျိုးပေါ်ထွက်လာလေတော့၏။

ချာလီသည် ညအချိန်အိမ်ပြန်လာတိုင်း ထိုသစ်ပင်ကြီးအောက်တွင် အပေါ့စွန့်သည်ကို မြင်သူကမြင်သည်ဟုဆိုသည်။ ထနောင်းပင်ကြီးမှာ ရုက္ခစိုး ရှိသည်ဟုယုံကြည်ထားကြသူများက တစ်ပေပတ်လည်ခန့်စင်ကလေးတစ်ခုကို ထနောင်းပင်၏လူတစ်ရပ်အမြင့်ခန့်၌ရိုက်ထားသည်။ စင်ကလေးပေါ်တွင် မြေပန်းအိုးတစ်လုံးကိုလည်းတင်ထားသည်။ ပန်းအိုးထဲတွင် ပန်းများမပြတ် ရှိနေတတ်သည်။ ထနောင်းပင်ကြီးမှာ တစ်ဦးတစ်ယောက်၏အိမ်ရှေ့တွင် ရှိနေခြင်းမဟုတ်ပဲ လမ်းထိပ်မှာ စည်ပင်သာယာနယ်မြေအတွင်းရှိနေခြင်း ဖြစ်သည်။

ချာလီသည် ညစဉ် အပြင်ကပြန်လာတိုင်း ထိုနေရာတွင်ရပ်၍ ထနောင်းပင်အောက်တွင် အပေါ့သွားသည်။ ဟုတ်မဟုတ်တော့မသိ။ ချာလီ ယခုလိုဖြစ်ပြီးနောက်ပိုင်းပြောသည့်စကားများထဲတွင် သစ်ပင်ကိုပင် သေးနဲ့ ပန်းသည်ဟုပြောကြပြန်သည်။ ဖြစ်လာလို့ ပိုပြောတတ်တဲ့ လူ့သဘာဝအတိုင်း ပြောကြတာလည်း ဖြစ်ရင်ဖြစ်မည်။ မည်သို့ဆိုစေ… ရုက္ခစိုးရှိသောသစ်ပင်ကို သေးနဲ့ပန်းလို့ ရုက္ခစိုးကဒဏ်ခတ်အပြစ် ပေးလိုက်တာလို့ ပြောကြလေ၏။

ရုက္ခစိုးလက်ချက်လို့ စွတ်စွဲသူများက တစ်အုပ်စုဖြစ်သလို… ထနောင်းပင်ကြီးရာဇဝင်ကို အကြောင်းပြု၍ တစ်နည်းတစ်ဖုံစွတ်စွဲသည့် စကားများလည်း ပေါ်ထွက်လာခဲ့သည်။

ထနောင်းပင်ကြီးတွင် တစ်ချိန်က လူတစ်ယောက်ကြိုးဆွဲချ၍ သေဖူး သည်။ ကြာလှပါပြီ။ ဤအရပ်တွင် လူတွေသိပ်မနေခင် မြေကွက်များ စံနစ် တကျချမထားခင် လွန်ခဲ့သောနှစ်ပေါင်းလေးဆယ်ကျော်က ဖြစ်ပါသည်။ ဘာအတွက်ကြောင့် သတ်သေသွားတယ်၊ သေတာဘယ်သူဆိုတာပင် မှတ်မိ သူမရှိတော့။ တစ်ဆင့်စကားတစ်ဆင့်နား ပြောကြရင်းဖြင့်သိနေကြခြင်းသာ ဖြစ်သည်။

မည်သို့ဆိုစေ… မြန်မာလူမျိုးတို့ထုံးစံအတိုင်းပေါ့၊ သေသူဟာ သရဲ ဖြစ်ပြီး ထနောင်းပင်ကြီးမှာ မှီခိုနေသည်ဟု ပြောသူကပြောကြလေ၏။ ချာလီ့ ကိုဒုက္ခရောက်အောင်လုပ်လိုက်သူက ထိုသရဲကြီးဟု ဆိုကြပြန်သည်။

ရုက္ခစိုးလက်ချက်လား၊ သရဲလက်ချက်လား… လက်ဆုပ်လက်ကိုင် ပြလို့ရတာမဟုတ်လို့ ဘယ်ဟာကိုယုံရမှန်းမသိ။ နှစ်မျိုးစလုံးလည်း ဟုတ်ချင် မှဟုတ်ပါလိမ့်မည်။ သူ့ဟာသူ ဖြစ်ချိန်တန်လို့ဖြစ်လာတာရော မဖြစ်နိုင်ဘူးလား။

_____

ချာလီမသန်မစွမ်းဖြစ်သွားပြီး ခြောက်လကြာချိန်၌ လမ်းထဲတွင် ထူးခြားသောအဖြစ်တစ်ခုပေါ်ပေါက်ခဲ့သည်။

အချိန်က နေဝင်ရီတရောအချိန်ကြီး။

ချာလီတို့အိမ်နှင့်မျက်စောင်းထိုးခြံမှ အိမ်ဖော်မလေးကို သရဲဝင်ပူး ခြင်းဖြစ်သည်။

ကောင်မလေးကိုသရဲပူးသည်ဆို၍ အိမ်နီးချင်းတွေအကုန် ပြေးသွား ကြည့်ကြသည်။ ကျွန်တော်လည်း ပါပါသည်။

ကောင်မလေးမှာ ပါးစပ်မှသွားရည်တွေထွက်ကျနေပြီး အသားတွေ တဆတ်ဆတ်တုန်နေသည်။

]]ငါဆာတယ်… ငါဆာတယ်… ငါ့ကိုအမဲသားကျွေး}}

…ဆိုကာ အမဲသားစားချင်ကြောင်းပြောသည်။

ကြားဖူးနားဝနှင့်အတွေ့အကြုံအနည်းငယ်ရှိဟန်တူသောမိန်းမကြီး တစ်ယောက်က ကောင်မလေးရှေ့မှာသွားရပ်သည်။

]]ဟဲ့- နင်ဘယ်သူလဲ}}

]]ငါ့ကိုအမဲသားကျွေး}}

]]ကျွေးမယ်၊ အမဲသားဟင်းသွားဝယ်စမ်း၊ နင်ဘယ်သူလဲပြော}}

]]အမဲသားဟင်းကျွေး၊ ကျွေးမှပြောမယ်}}

ဝင်ပူးသောသရဲက အမဲသားချည်းဇွတ်တောင်းကာ ဘယ်သူဘယ်ဝါ မပြောပဲ တင်းခံနေသည်။ ကောင်မလေးပြန်ပြောသောအသံကတော့ ပုံမှန် အသံမျိုးမဟုတ်။ အသံတုန်တုန်၊ ဩဩကြီးဖြစ်နေသည်။

]]အမဲသားဟင်း ရှိတယ်၊ ရှိတယ်၊ ရော့- ရော့- အမဲသားဟင်း၊ ရပြီ}}

တိုက်ဆိုင်ချင်တော့… ထိုအိမ်က ထိုနေ့မှာ အမဲသားဟင်းချက်တဲ့ နေ့ဖြစ်နေသည်။ အိမ်ရှင်မက အမဲသားဟင်းတစ်ခွက်ကြီးခပ်ယူလာကာ ကောင်မလေးရှေ့ချပေးလိုက်သည်။

ကောင်မလေးအမဲသားဟင်းကို စားပုံမှာ ကြောက်စရာကောင်းလှ သည်။ လက်ငါးချောင်းဖြင့် အမဲသားနှပ်များကို နှိုက်သည်။ ပလုပ်ပလောင်း စားသည်။ စားရင်းဖြင့် ဝိုင်းကြည့်နေသူများကို မျက်ထောက်နီကြီးဖြင့် ကြည့် သေးသည်။ ပါးစပ်တဝိုက်လည်း ဟင်းဆီရည်တွေပေကျံနေသည်။

အိမ်ဖော်မလေးသရဲပူးသည်ကိုမကြည့်ရဲ၍ မိန်းကလေးနှစ်ယောက် မှာ ပြန်ပြေးသွားလေသည်။

]]ဟဲ့- နင့်ကိုအမဲသားဟင်းကျွေးပြီးပြီ၊ နင်ဘယ်သူလဲပြောစမ်း}}

မိန်းမကြီးက အထက်စီးနင်းလေသံဖြင့် ခါးထောက်ကာ သရဲကို မေးလိုက်သည်။

]]ချာလီ၊ ချာလီ၊ ငါ… ချာလီ}}

ဟယ်…

ဟင်…

ဟာ…

ကြားရသူအားလုံး အံ့ဩသွားကြသည်။

ချာလီတဲ့။ ချာလီက သေမှမသေသေးပဲ။

တိုက်ဆိုင်စွာ… ထိုအချိန်၌ ချာလီသည် ဘီးတပ်ကုလားထိုင်ဖြင့် မျက်စောင်းထိုးက သူ့အိမ်ရှေ့မှာထိုင်နေသည်။

]]ဟဲ့- နင်ချာလီဘယ်လိုဖြစ်နိုင်မှာလဲ၊ ချာလီက ဟိုမှာလေ}}

]]မဟုတ်ဘူး၊ အဲဒါ ငါမဟုတ်ဘူး၊ ငါက ထနောင်းပင်ပေါ်မှာနေ ရတယ်၊ ထနောင်းပင်ပေါ်ကကောင်က ငါ့အယောင်ဆောင်ပြီး ငါ့အိမ်ပေါ် တက်နေတာ၊ ငါ… ငါ.. အီး.. ဟီးဟီး..}}

ကောင်မလေးက ရှိုက်ကြီးတငင်ငိုလိုက်ပြီးနောက် ကြမ်းပြင်ပေါ် ပုံလဲကျသွားလေတော့သည်။

သရဲထွက်သွားပြီ။ ဘာမှဆက်မေးလို့မရတော့။

လူအားလုံးအကြည့်များက ဘီးတပ်ကုလားထိုင်ပေါ်ထိုင်နေသော ချာလီ့ဆီရောက်သွားကြ၏။ ချာလီက မျက်လုံးကြီးပြူးကာ လူတွေကိုပြန် ကြည့်နေသည်။ အားလုံး ကြက်သီးမွေးညင်းထသွားကြ၏။

]]အောင်မယ်လေး… ဒါဖြင့်… ဟိုဟာ… ဟိုဟာ… ချာလီအစစ် မဟုတ်ဘူးပေါ့၊ ဖုတ်… ဖုတ်… ဖုတ်ဝင်နေတာ၊ အမလေးတော့…}}

အများရှေ့မှာ လူတတ်ကြီးလုပ်ပြီး သရဲကိုမေးမြန်းခဲ့သောမိန်းမကြီးက အလန့်တကြားအော်လိုက်လေသည်။

_____

အိမ်ဖော်မလေးကိုပူးပြီးပြောသွားသောသရဲ၏အပြောအရဆိုလျှင် အဖြစ်အပျက်က ရှင်းနေသည်။

ထနောင်းပင်ကြီးတွင် နေနေသောသရဲက သေသွားသောချာလီ့ ကိုယ်ထဲပူးဝင်နေခြင်းဖြစ်သည်။ ချာလီအယောင်ဆောင်၍ ချာလီ့အိမ်ပေါ်မှာ တက်နေနေခြင်းဖြစ်လေသည်။ လက်ရှိမြင်တွေ့နေရသောချာလီမှာ ဖုတ်ဝင် နေသောဖုတ်ကောင်ကြီးဖြစ်လေသည်။

တကယ့်ချာလီအစစ်ကတော့… သေပြီးနောက်မှာ သရဲဖြစ်ကာ ထနောင်းပင်ကြီးပေါ်မှာ နေနေရတယ်တဲ့။

ဖုတ်ဝင်သောဇာတ်လမ်းဇာတ်ကွက်တွေမှာ မဆန်းသော်လည်း ချာလီ့အဖြစ်က ဆန်းနေသည်။ ကြားဖူးနေကျဖုတ်ဇာတ်လမ်းများမှာ သေသူ ကိုယ်ထဲကို အပြင်ပက နာနာဘာဝက ဝင်ပူးနေကာ အစားအသောက်များ အဆမတန်စားသောအဖြစ်မျိုးသာဖြစ်သည်။ အပူးခံရသူမှာ သေသွားပြီ။ သေသူ၏ဝိညာဉ်က ဘယ်ရောက်သွားမှန်းမသိ။ သမရိုးကျဖုတ်ဇာတ်လမ်း များတွင် သေသူ့အပိုင်းကိုထည့်မစဉ်းစားကြပေ။

အိမ်ဖော်မလေးကို ပူးပြောသွားပုံအရတော့ သေသူချာလီကိုယ်တိုင် ပင် သရဲဖြစ်နေရသည်။ သူ့ခန္ဓာကိုယ်ကိုတော့ အခြားနာနာဘာဝတစ်ကောင် က အပိုင်စီးထားခြင်းခံနေရသည်။ ဒါကို… တကယ့်ချာလီအစစ်ဖြစ်သော သရဲက မခံမရပ်နိုင်ဖြစ်ပြီး ပူးပြောခြင်းဖြစ်ပါသည်။

_____

အိမ်ဖော်မလေးကို ချာလီသရဲဝင်ပူးသောသတင်းက ချာလီတို့ မိသားစုထံသို့ ရောက်ရှိသွားလေသည်။

အိမ်ဖော်မလေး၏ အိမ်ရှင်မိန်းမကြီးကပင် သွားပြောခြင်းဖြစ်၏။ သူကတော့ စေတနာနှင့်သွားပြောခြင်းဖြစ်ပါသည်။ ပယောဂဆရာခေါ်ပြီး ဖုတ်ထုတ်ဖို့ပင် အကြံပေးလိုက်သေးသည်။

သို့သော်… ချာလီ့အဖေဦးမိုက်ကယ်က လက်မခံ။ ဒါတွေမဖြစ်နိုင်၊ အယုံအကြည်မရှိဘူးဟု ပြန်ပြောလိုက်သည်။ သတင်းလာပေးသောမိန်းမကြီး ကိုပင် စိတ်ဆိုးသွားသေးသည်။

]]ကျုပ်သားကို ကျုပ်တို့မျက်စိရှေ့မှာမြင်နေရတာပဲ၊ ကျုပ်သား မသေသေးဘူး၊ ဖုတ်ဝင်တာတွေဘာတွေ ကျုပ်နားမလည်ဘူး၊ ယုံလည်း မယုံဘူး၊ နောင် ဒါမျိုးပြောရင် ခင်ဗျားတို့ကို တရားစွဲရလိမ့်မယ်၊ ဒါပဲ}}

စေတနာနှင့်သွားပြောသောအန်တီကြီးမှာ မျက်နှာမရပဲ တပ်လန်၍ပြန်လာရလေသည်။

ခက်တာက ချာလီတို့မိသားစုသည် ဗုဒ္ဓဘာသာဝင်များမဟုတ်။ ဖုတ်တို့၊ ပြိတ္တာတို့၊ တစ္ဆေတို့ကိုလည်း အယုံအကြည်မရှိပေ။ သူတို့မျက်မြင်မှာ သူတို့ရှေ့၌ ချာလီရှိနေသည်။ မသန်းမစွမ်းဖြစ်နေသော သူတို့သားကို ပြုစုရမည်။ အလိုလိုက်ရမည်။ လိုချင်တာလုပ်ပေးရမည်။ ဒါပဲသိသည်။

_____

တစ်လမ်းလုံးကတော့ ထိုအချိန်မှစ၍ ထိတ်လန့်ချောက်ခြားမှုများ ဖြင့် လွှမ်းခြုံသွားလေတော့သည်။

ညနေပိုင်း ချာလီ ဘီးတပ်ကုလားထိုင်ဖြင့်အိမ်ရှေ့ထွက်ထိုင်နေလျှင် ထိုရှေ့က မဖြတ်ရဲကြတော့။ ကွင်းရှောင်သွားကြသည်။

ထိုအနားမှာ ကစားနေကျကလေးများလည်း နေရာရွှေ့ကစားကြ သည်။

ချာလီ့ကို စေ့စေ့မျှပင် မကြည့်ရဲကြတော့ပေ။

လမ်းထိပ်ကထနောင်းပင်ကြီးကိုလည်း နေဝင်သည်နှင့်ကွင်းရှောင် ကြသည်။ မလွှဲမရှောင်သာဖြတ်သွားရပါကလည်း နှုတ်မှ ဘုရားစာကို တီးတိုး ရွတ်ဆိုကြသည်။ ]]ဖွ-ဖွ}}ဟု ရွတ်ဆိုကြသည်။ ကလေးပါလာလျှင် မြေမှုံ ဖြင့်နဖူးကိုသိပ်ပေးကြသည်။ လမ်းသူလမ်းသားများလည်း အတော်ပင် အလုပ် များသွားကြလေ၏။

]]ဒုက္ခပဲ၊ သူတို့ဟာသူတို့အယုံအကြည်မရှိတာအရေးမကြီးဘူး၊ ရပ်ကွက်ထဲမှာ ဖုတ်ဝင်နေတဲ့လူရှိတာ ရပ်ကွက်နာတယ်တော့}}

]]ဒါတွင်လား၊ ဝင်နေတဲ့ဖုတ်က ထွက်သွားရင် တစ်ရပ်လုံးဒုက္ခ ရောက်ကြဦးမှာလေ၊ ဖုတ်ဝင်တယ်ဆိုတာ သေပြီးတဲ့လူရဲ့ကိုယ်ထဲ တခြား သရဲက ဝင်အောင်းနေတာ၊ ဖုတ်ထွက်သွားတာနဲ့ သေတဲ့အချိန်ကာလအတိုင်း ပုပ်ပွနေတာတို့၊ အရိုးကျနေတာတို့ ဖြစ်တတ်တာတဲ့လေ၊ ဖုတ် ထွက်သွားမှ သူတို့နောင်တရမှာ မြင်ယောင်သေးသတော်}}

]]အယုံအကြည်မရှိတဲ့လူတွေ နောင်တရç ရပေစေ၊ အဲဒီကျမှ မှတ်မယ်၊ လောလောဆယ် အရပ်ထဲမှာ ဖုတ်ကောင်ကြီးရှိနေတာ ကျုပ်တို့ မှာအနေရခက်လိုက်တာ၊ လာဘ်တိတ်တာပေါ့တော်}}

ချာလီ့အခြေအနေကလည်း သတိချွတ်ယွင်းပြီး မစွမ်းမသန်ဖြစ် သွားသည်ဆိုသည့်တိုင် အစားအသောက်ကတော့မပျက်။ သာမန်လူကောင်း သူကောင်း သန်မာသူများထက်ပင် စားနိုင်သောက်နိုင်သေးသည်။ ပြီးတော့ အသားငါးကိုမှမက်မက်မောမောစားသည်။ ဒါတွေကိုကြည့်၍ ဖုတ်ဝင်နေတာ အမှန်ပါပဲလို့ ကောက်ချက်ချကြသည်။

ချာလီတို့အိမ်ဘေးတစ်ဖက်တစ်ချက်မှ ကပ်ရက်အိမ်များသည် ၂၄ပစ္စည်းပဌာန်းကို ကွန်ပြူတာစာစီပြီး အိမ်၏လေးဖက်လေးတန်မှာ ကပ် ထားကြသည်။ နာနာဘာဝအတားအဆီးဖြစ်အောင်တဲ့။ ဒါကိုသိသွားသော ကျန်အိမ်များကလည်း အိမ်ရှေ့များတွင် ပဌာန်း၂၄ပစ္စည်းသာမက သံဗုဒ္ဓေ ဂါထာတို့၊ စမ္မခဏ်ဂါထာတို့ကို စာရွက်ဖြင့်ရေး၍ရိုက်၍ကပ်ထားကြတော့ သည်။

တစ်လမ်းလုံးမှရှိသမျှလူများနှင့် ချာလီတို့မိသားစုမှာလည်း ခပ် တန်းတန်း၊ ခပ်စိမ်းစိမ်း၊ ခပ်စောင်စောင်ဖြစ်သွားကြလေတော့သည်။

_____

တစ်နေ့သ၌… ချာလီ့အဖေ ဦးမိုက်ကယ်သည် ကျွန်တော့်ကိုခေါ်၍ စကားပြောခဲ့သည်။

]]ဆရာတို့လမ်းထဲကလူတွေက ဘယ်လိုလဲဗျ၊ တော်တော်ရူးကြောင် ကြောင်နိုင်တဲ့လူတွေပဲ}}

]]ဗျာ-}}

]]ကျွန်တော့်သားကို ဖုတ်ဝင်သလေးဘာလေးစွတ်စွဲနေကြတယ်၊ သူတို့မရှက်ဖူးလားဗျာ၊ ဒီကိစ္စဘယ်လိုဖြစ်လာတယ်ဆိုတာ ဆရာကော သိ သလား}}

]]အဲ.. အင်း.. ပြောနေကြတာပဲ}}

ကျွန်တော်က သရဲပူးချိန်က ကျွန်တော်ရှိနေကြောင်းမပြောချင်၍ ရောချလိုက်ရသည်။

]]အိမ်ရှေ့အိမ်က အိမ်ဖော်မလေးကို သရဲပူးသတဲ့ဗျာ၊ ပူးတဲ့သရဲ က… သူဟာ ကျွန်တော့်သားချာလီပါလို့ပြောသတဲ့၊ ကျွန်တော့်သားကိုယ်ထဲ မှာတော့ ဖုတ်ဝင်နေတာပေါ့လေ၊ ဒီမယ်… အဲဒီအိမ်ကလူတွေ ဘယ်လောက် ကပ်စီးနဲတယ်ဆိုတာ ဆရာသိသလား}}

]]ဗျာ-}}

]]သရဲပူးတယ်လို့ဖြစ်လာရတဲ့အကြောင်းရင်းကို ကျွန်တော်ပြောမလို့ ပါ၊ တကယ်တော့… အဲဒီအိမ်ကလူတွေက အိမ်ဖော်မလေးကို ထမင်းကောင်း ကောင်းမကျွေးဘူး၊ ၀အောင်တောင်မကျွေးဘူးဗျ}}

]]ဟင်…}}

]]ကျွန်တော်စုံစမ်းပြီးပြီ၊ သူတို့က ထမင်းကို အိမ်ဖော်မလေးအတွက် မကောင်းတဲ့ဆန်ကို တစ်အိုးသပ်သပ်ချက်ပြီး စားခိုင်းတယ်၊ သူတို့စားတဲ့ ဆန်နဲ့ ကောင်မလေးက မစားရရှာဘူး၊ ဟင်းကိုလည်း ၀အောင်မပေးဘူး၊ ပုံစံခွက်နဲ့ နည်းနည်းပဲထည့်ပေးတာဗျ}}

]]ဪ…}}

]]အဲဒီတော့.. အိမ်ဖော်မလေးက ဟင်းကောင်းကောင်းစားချင်လို့ သူ့နည်းသူ့ဟန်နဲ့ကြံတာပေါ့ဗျာ၊ သရဲဝင်ပူးတယ်ဆိုပြီး အမဲသားဟင်းတောင်း စားတော့ သူလည်း အမဲသားအဝစားရရောမဟုတ်လား}}

]]ဗျာ- အဲဒီလိုလား}}

]]ဆရာစဉ်းစားကြည့်လေ၊ အိမ်ဖော်မလေးသရဲဝင်ပူးတဲ့နေ့မှ အမဲ သားက အဆင်သင့်ချက်ပြီးသားရှိနေတာကို၊ အိမ်ဖော်မလေးက အိမ်မှာ အမဲသားချက်မှန်းသိလို့ စားရအောင် ဒီလိုကြံတာပေါ့ဗျ၊ ရှင်းနေတာပဲ}}

]]အင်း… ရှုပ်လိုက်တာနော်}}

]]အို… ရှုပ်တာမှ တော်တော်ရှုပ်ပါတယ်ဗျာ၊ ဘဲ့နဲ့… တောကလာ တဲ့ ဆယ့်လေးငါးနှစ်အရွယ်ကောင်မလေးလိမ်တာကို တစ်လမ်းလုံးက ဝိုင်း ယုံနေကြတယ်လို့၊ သူတို့အစားရှက်လိုက်တာဗျာ}}

]]ဟုတ်တာပေါ့လေ}}

]]ကျွန်တော့်သားကို ဓားစာခံလုပ်တာကို ကျွန်တော်က မခံချင်ဘူး၊ အင်း… ချာလီ့အဖြစ်ကလည်း ဟိုကောင်မလေးလိမ်စားဖို့ အံဝင်နေတာကိုး}}

]]ဟုတ်ပါရဲ့ဗျာ၊ ဒါတော့မကောင်းပါဘူး}}

]]မြို့ကြီးပြကြီးမှာနေပြီးတော့ ဒီလိုရှေးဆန်ဆန်အခြေအမြစ်မရှိ တဲ့ဟာတွေ ယုံနေတဲ့လူတွေ… ဘယ်လိုကြီးပွားနိုင်တော့မှာလဲဗျာ၊ ကျွန်တော် တော့ ရင်လေးပါရဲ့၊ ဒါမျိုးတွေများများရှိနေရင်…}}

_____

ဦးမိုက်ကယ်စွပ်စွဲတဲ့ အသုံးမကျသူတွေစာရင်းမှာ ကျွန်တော်ရော ပါနေပြီလား။

အိမ်ဖော်မလေးဟာ တကယ်ပဲ အမဲသားစားချင်လို့လိမ်တာလား။

ချာလီ့ကိုဖုတ်ဝင်နေတာ အမှန်ပဲလား။

ဘယ်လိုမှ ဖြေရှင်းလို့မဖြစ်နိုင်သောကိစ္စများဖြစ်ပါသည်။

လမ်းထဲကလူတွေ ယုံနေတဲ့အစွဲအလန်းကိုလည်း ခုအချိန်ကျမှ ချွတ်လို့မဖြစ်တော့။ လမ်းထဲကလူတွေကတော့ ချာလီ့ကို စေ့စေ့မကြည့်ရဲ အောင်ပင်ကြောက်နေကြသည်။ ချာလီ့ကိုယ်ထဲက ဖုတ်ထွက်သွားလျှင် ဖြစ်လာမည့်အဖြစ်ကိုတွေးတောရင်း ရင်သိမ့်တုန်နေကြသည်။

ယခုအထိတော့… ဘာမှဆက်ဖြစ်မလာသေး။

ချာလီကလည်း ညနေတိုင်း အိမ်ရှေ့သို့ ဘီးတပ်ကုလားထိုင်လေး စီး၍ရောက်လာမြဲ။ တွေ့သမျှလူတွေကို မျက်လုံးစိမ်းစိမ်းကြီးဖြင့်ကြည့်နေမြဲ။ အစားအသောက်တွေကိုလည်း အဝအပြဲစားဆဲ။

အရပ်ထဲကလူတွေကလည်း ချာလီ့ကိုကွင်းရှောင်မြဲ။ ချာလီသရဲ ရှိတယ်ဆိုတဲ့ ထနောင်းပင်ကြီးကိုလည်း ရှောင်ရှားကြမြဲ။

အခုဆိုလျှင် ချာလီမသန်မစွမ်းဖြစ်သွားသည်မှာ တစ်နှစ်ပင်ကျော် သွားပါပြီ။

ဘာမှတော့ ဆက်ဖြစ်မလာသေးပါ။

_____

                                                                          နွေတမာန်

                                     

 ဂမ္ဘီရလောက မဂ္ဂဇင်း....မှ