Thursday 13 September 2012

ဆောင်းလုလင် - အပွင့်ပေါ်အရွက်ဖုံးပါလို့ (၀တ္ထုတို)

ဆောင်းလုလင်
အပွင့်ပေါ်အရွက်ဖုံးပါလို့

ယခုဖော်ပြသည့် ၀တ္ထုတိုလေးမှာ 
ထိုင်းနိုင်ငံမှ မြန်မာဘာသာဖြင့်ထုတ်ဝေသော
ကာလာရိမ်းဘိုးမဂ္ဂဇင်း Colours Rainbow Magazine တွင်
ဖော်ပြပါရှိခဲ့သော ၀တ္ထုတိုဖြစ်ပါသည်။


အပွင့်ပေါ် အရွက်ဖုံးပါလို့
by www.coloursrainbow.com on Thursday, 10 November 2011 at 19:31
 

“ပထမတော့ ဆရာနဲ့တပည့် ရိုးရိုးခင်မင်ကြ၊  
သံယောဇဉ်တွယ်ကြတယ် ထင်မိတာ မြရယ်၊
အရွယ်ချင်းကလည်း သားအဖ အရွယ်လေ၊
ကျွန်မလည်း ဘယ်ထင်မလဲ၊
ကိုကြည်မောင်က ကောင်မလေးကို
ခေါ်တော့လည်း သမီးတဲ့၊ အခုလို
ဗိုက်ထွက်လာပြီဆိုမှ သူတို့အကြောင်းကို
ကျွန်မ သိရတော့တာ၊
ကျွန်မကိုယ်က အ,တာပါလေ”


မျက်ရည်စက်လက်နဲ့ ပြောပြနေတဲ့ မခင်ဝေ စကားတွေကို နားထောင်ရင်း မမြသွေး သက်ပြင်းချမိ တယ်။
မခင်ဝေ့ယောက်ျား ကိုကြည်မောင့်အသက်က ငါးဆယ်နီးနေပါပြီ။ ကိုကြည်မောင်က ကုမ္ပဏီတစ်ခုက မန်နေဂျာပါ။ ကလျာဆိုတာ ကိုကြည်မောင့်ရဲ့ ပီအေခေါ် စက္ကထရီခါ် အနီးကပ်နေရတဲ့ ကိုယ်ရေး အတွင်းရေးမှူးပေါ့။ ကောင်မလေးက ၂ဝ ကျော်ရုံလေး။

ကိုကြည်မောင်က တစ်သက်လုံး သိက္ခာရှိရှိ နေလာခဲ့ပြီး ဘာမျှ အစွန်းအထင်းမရှိတဲ့လူ။ သားသမီးကလည်း သုံးယောက်။ နှစ်ယောက်က ဘွဲ့ရပြီးပြီ။ တစ်သက်လုံး မိသားစုအပေါ်မှာ တာဝန်ကျေကျေ ရိုးရိုးသားသား နေလာခဲ့တော့လည်း မခင်ဝေက ကိုကြည်မောင့်ကို ဒီလိုဖြစ်လိမ့်မယ်ဆိုတာ တွေးတောင်မတွေးမိဘူး။
ပြီးတော့ ကလျာကလည်း သမီးအလတ်မနဲ့မှ ရွယ်တူလေ။ ကလျာ့မှာ လက်ရှိတွဲနေတဲ့ ရည်စားရှိတာကိုလည်း သိထားတယ်။ ရုံးအဆင်းမှာ ကောင်လေးက လာကြိုနေကျပဲ။ အဲသည်တော့ ကိုကြည်မောင်နဲ့ ကလျာကို ဟိုလိုဒီလို ဖြစ်ကြလိမ့်မယ်ဆိုတာ ယောင်လို့တောင် မတွေးမိခဲ့တဲ့ကိစ္စပါ။

ကိုကြည်မောင်နဲ့ သူ့ပီအေမလေးကလျာ ဘယ်အချိန်မှာ ဘယ်လို ခြေပုန်းခုတ်လိုက်ကြတယ် မသိဘူး။ မနေ့ကမှ ကလျာ့မှာ ကိုယ်ဝန်ရှိနေပြီဆိုမှ ကိုကြည်မောင်က အဖြစ်အပျက်အားလုံးကို ဝန်ခံလို့ သိလိုက်ရတာ။

“ဝေရယ်... ကိုကြည်မောင်နဲ့ရတဲ့ ကိုယ်ဝန်ဆိုတာ သေချာလို့လား”

“သူကိုယ်တိုင် ဝန်ခံနေမှပဲ မြရယ်”

“ကလျာ့ရည်းစား ကောင်လေးကရော၊ သူ့ကောင်လေးနဲ့ရတဲ့ ကိုယ်ဝန်ကို ကောင်လေးက ရှောင်သွားလို့ ကိုကြည်မောင်က သနားပြီး တာဝန်ယူလိုက်တာမျိုးများလား ဝေရယ်”

မမြသွေးက ဝတ္ထုဇာတ်လမ်းဆန်ဆန်တွေးပြီး ပြောလိုက်တယ်။ မခင်ဝေရဲ့ သောကကိုလည်း ပြေလျော့သွားစေချင်တဲ့ သဘောပါ။

“မဟုတ်ပါဘူးမြရယ်၊ ကလျာက သူနဲ့ကိုကြည်မောင့်အဖြစ်ကို ပြောပြလိုက်လို့ ကောင်လေးက ရှောင်ထွက်သွားပြီတဲ့၊ သူတို့ချင်း မလွှဲမရှောင်သာလို့ ဒီလိုဖြစ်သွားရတာပါဆိုတာ ကိုကြည်မောင်ကလည်း ဝေ့ကို ဝန်ခံပြီးပါပြီ မြရယ်”

“ဖြစ်ရလေဝေရယ်... ဒါဖြင့် ဘယ်လိုဆက်လုပ်ကြမလဲဟင်”

“ဟင့်.. ဟင့်... ဝေလည်း မပြောတတ်တော့ပါဘူး မြရယ်၊ ဝေ့ ခေါင်းတွေထူပူနေတယ်၊ ဝေတော့ သေသာသေချင်တော့တာပဲ”

မမြသွေး မခင်ဝေကိုကြည့်ပြီး သက်ပြင်းသာ ချမိပါတော့သည်။ သနားလည်း သနားနေမိ၏။

“မြရေ... ယောက်ျားတွေဟာ စိတ်မချရဘူးဆိုတာ သိပ်မှန်တာပဲနော်၊ ဝေကတော့ ကိုယ့်သမီးအရွယ်လေးနဲ့ ဘယ်ထင်မိမလဲကွယ်။ သြော်... ယောက်ျားတွေ ယောက်ျားတွေ...  တစ်ခုမဟုတ် တစ်ခုတော့ ဆိုးနေကြတာပဲနော်။ ဝေ့အတွက်တော့ လွန်သွားပြီ။ မြလည်း သတိနဲ့သာ နေပေတော့ မြရေ...”

မခင်ဝေက စေတနာနဲ့ပြောတာပဲ ဖြစ်မှာပါ။ မမြသွေးလည်း ပြောရင်းငိုနေတဲ့ မခင်ဝေကို ငေးပြီးတော့သာ ကြည့်နေမိတော့တယ်။

“ကိုယ်လည်း ရှေ့မျက်နှာနောက်ထားပြီးပြောရတာပါ မြရယ်...  ရှက်လည်း ရှက်ပါတယ်။ မြမှ မကူညီရင်လည်း ကိုယ်တို့ တစ်မိသားစုလုံး အရှက်ကွဲရတော့မယ်လေ။ ကိုယ့်ကိုသနားရင် ကူညီပါဦးမြရယ်”

မမြသွေးဟာ ရှေ့က ဆက်တီစားပွဲပေါ်မှာ တင်ထားတဲ့ သုံးကျပ်သားရှိတယ်ဆိုသော လော့ကက်ပါ ရွှေဆွဲကြိုးကိုကြည့်ရင်း ငိုင်နေမိတယ်။ လက်ရှိရွှေပေါက်ဈေးနဲ့ဆိုရင် သုံးကျပ်သားဆွဲကြိုးကို သိန်းနှစ်ဆယ်တောင်းတာ များတာပေါ့။ အပေါင်ခံတယ်ဆိုတာ ကာလတန်ဖိုးရဲ့ သုံးပုံတစ်ပုံလောက်ပဲ ပေးနေကျ မဟုတ်လား။ သုံးကျပ်သားဆွဲကြိုးကို အပေါင်ယူထားပြီး ငွေသိန်းနှစ်ဆယ် ထုတ်ပေးရမယ်ဆိုတော့။

မသီတာကလည်း မမြသွေးအတွေးကို ရိပ်မိပုံရပါတယ်။

“ကိုယ့်မှာ အိမ်ဂရံလည်း ပါလာပါတယ်မြ။ အိမ်ဂရံကိုလည်း ယူထားလိုက်ပါ။ ကိုတင့်ဆန်းတို့ ရွှေဘိုကအိမ်ကိုရောင်းပြီး သူတို့မောင်နှမတွေ အမွေခွဲဖို့လုပ်နေပါတယ်။ မကြာပါဘူး။ သုံးလေးလပါ။ အမွေခွဲရင် ကိုယ်တို့ လေးဆယ်လောက်ရမှာပါ။ မဖြစ်သာလို့ ရှေ့မျက်နှာနောက်ထားပြီး အကူအညီတောင်းရတာပါ မြရယ်”

မသီတာယောက်ျား ကိုတင့်ဆန်းက ဌာနကြီးတစ်ခုက အရာရှိကြီးကြီးတစ်ယောက်ပါ။ ငွေကြေးကိုင်ပြီး သုံးပိုင်ခွင့်ရှိတယ်။ ကိုတင့်ဆန်းက လောင်းကစား ဝါသနာပါတယ်။ ဖဲပါ။ ဖဲဝိုင်းရှိရင် သားမေ့ မယားမေ့ ဖဲရိုက်တတ်တယ်။ စနေ၊ တနင်္ဂနွေနေ့များဆို အိမ်မပြန်ပဲ ဖဲကို တစ်ညလုံး ထိုင်ရိုက်တဲ့ လူစားမျိုးပါ။ အခု ပြဿနာဖြစ်နေတာက တလောက ဖဲဝိုင်းမှာ ကိုတင့်ဆန်း ဆက်တိုက်ရှုံးခဲ့တယ်။ ရုံးငွေတွေ ထည့်သုံးခဲ့မိတယ်။ ပြန်ပြီး လည်ပတ်နိုင်မယ်ထင်တာ စာရင်းစစ်ဝင်ခါနီး အချိန်အထိ ငွေကပြန်မပေါ်တော့ဘူး။ အဲဒီတော့ စိုက်ရမယ်။ မစိုက်နိုင်ရင် အရေးယူခံရမယ်၊ အလုပ်လည်းပြုတ်မယ်၊ အရှက်လည်း ကွဲမှာပေါ့။

အဲဒါကြောင့် မသီတာက သူ့ဆွဲကြိုးလေးကို မမြသွေးဆီမှာ လာပေါင်ပြီး အကူအညီတောင်းနေတာပါ။

မမြသွေးက ငယ်သူငယ်ချင်းကို ကူညီချင်ပေမယ့် ဒါလောက်များတဲ့ ငွေအချိုးအစားကိုတော့ သူ့ယောက်ျား ကိုဖေဝင်းကို မတိုင်ပင်ပဲ မပေးရဲဘူး။ ပြီးတော့ တောင်းတဲ့ငွေက ထားတဲ့ပစ္စည်းထက် များနေတယ်လေ။ မသီတာကလည်း ငွေကို အခုပဲယူသွားချင်ပုံပဲ။ ပေးမယ်ဆိုရင်တောင် မမြသွေးအနေနဲ့ ကိုဖေဝင်းဆိုင်ကို လိုက်သွားပြီး ကိုဖေဝင်းကို တိုင်ပင်အသိပေးပြီးမှ ပေးလို့ဖြစ်မှာပါ။

ဒါပေမယ့် မသီတာအတွက် ကံကောင်းသွားတယ်လို့ပဲ ပြောရတော့မှာပဲ။ ပြန်လာနေကျမဟုတ်ပဲ ကိုဖေဝင်း အိမ်ကိုပြန်ရောက်လာတယ်။
မမြသွေးလည်း ယောက်ျားလုပ်တဲ့လူကို အခန်းထဲခေါ်ပြီး မသီတာရဲ့ ဒုက္ခကို ပြောပြရတာပေါ့။

“ပေးလိုက်ပါကွာ၊ မင်းရဲ့ ငယ်သူငယ်ချင်းပဲ၊ သူလည်း မျက်နှာလွှဲခဲပစ်တော့ လုပ်မယ်မထင်ပါဘူး၊ သူပေးတဲ့ဟာလေးတွေတော့ ယူထားလိုက်ပေါ့၊ ကူညီလိုက်ပါကွာ၊ ကုသိုလ်ရပါတယ်”

မမြသွေးလည်း သူငယ်ချင်းကို ကူညီခွင့်ရလို့ ဝမ်းသာအားရနဲ့ မသီတာလိုချင်တဲ့ သိန်းနှစ်ဆယ်ကို ချက်ချင်းပဲထုတ်ပေးလိုက်ပါတယ်။ မသီတာဆိုတာ ဝမ်းသာလွန်းလို့ အသားတွေတောင် တဆတ်ဆတ်တုန်လို့။

“ကျေးဇူးတင်လိုက်တာ သူငယ်ချင်းရယ်၊ ကိုယ်တို့တစ်မိသားစုလုံးရဲ့ ဒုက္ခကို မင်းကယ်တင်လိုက်တာပါကွာ၊ သိပ်ကျေးဇူးတင်တာပဲ”
မျက်ရည်တွေကျပြီး ပြောရှာတယ်။

တို့ကိုထက် ကိုဖေဝင်းကိုသာ ကျေးဇူးတင်ပါ သီတာရယ်၊ သူက မင်းတို့အခက်အခဲကို ပြောပြတော့ ချက်ချင်းပဲခွင့်ပြုလိုက်လို့ တို့လည်း မင်းကိုပေးနိုင်တာပါ၊ လင်ယောက်ျား ခွင့်ပြုချက်မရပဲလည်း တို့မပေးရဲဘူးလေ၊ ဒါအမှန်ပြောတာ”

“ဟုတ်တာပေါ့၊ ဟုတ်တာပေါ့ သူငယ်ချင်းရယ်၊ ကိုဖေဝင်းက တကယ့်သူတော်ကောင်းပါ၊ မင်း ယောက်ျားရတာ ကံကောင်းပါတယ်၊ ကိုယ်တော့ ကိုတင့်ဆန်း ဆိုးကျိုးတွေကို ဘယ်အထိ ခံနေရဦးမလဲ မသိပါဘူးမြရယ်”

မသီတာပြောသွားတဲ့အတိုင်းပါပဲ။ မမြသွေးယောက်ျားရ ကံကောင်းခဲ့ပါတယ်။ ကိုဖေဝင်းဟာ အိမ်ထောင်သက် နှစ်ဆယ်ကျော်အတွင်းမှာ သစ္စာရှိရှိနဲ့ မမြသွေးကို ပေါင်းသင်းခဲ့တယ်။ ကိုဖေဝင်းမှာ ဘာတစ်ခုမှ အစွန်းအထင်း မရှိခဲ့ဘူး။ အိမ်ထောင်ကျတဲ့နေ့ကစလို့ ဒီနေ့အထိ ကိုဖေဝင်း အရက်သောက်တာ တစ်ခါမျှ မရှိဖူးဘူး။ အရက်မပြောနဲ့ ဆေးလိပ်လည်း မသောက်ဘူး၊ ကွမ်းလည်း မစားဘူး။ လောင်းကစားဆိုတာတော့ ဝေးရောပဲ။ ဖဲဝိုင်းထိုင်ဖို့ထားလို့ အများတကာ ထိုးကြတဲ့ နှစ်လုံး သုံးလုံးကိုတောင် အပျော်သဘောနဲ့ တစ်ခါတရံမျိုးတောင် မထိုးဘူးပါဘူး။ ကိုဖေဝင်းဟာ ပကတိ ရိုးသားသန့်စင်သူ တစ်ဦးပါပဲ။

ယောက်ျားတော်တော်များများ ကင်းရှင်းခဲတဲ့ မိန်းမကိစ္စမှာလည်း ကိုဖေဝင်း ကင်းရှင်းခဲ့ပါတယ်။ မိန်းမရှုပ်နိုင်လောက်အောင် အခြေအနေပေးပေမယ့် မရှုပ်ထွေးပဲ ရှင်းရှင်းသန့်သန့်နေခဲ့တဲ့ ယောက်ျားတစ်ယောက်ပါ။


အခုဆို ကိုဖေဝင်းနဲ့မမြသွေးတို့ အိမ်ထောင်သက် နှစ်၂ဝ ကျော်လို့ ၂၄ နှစ်ထဲတောင် ရောက်နေပြီလေ။ တစ်ဦးတည်းသော သမီးလေးတောင် အိမ်ထောင်ကျလို့ မြေးလေးတစ်ယောက် ရနေပြီကော။ ကိုဖေဝင်းကော၊ မမြသွေးရော အသက် ၄၅ နှစ် ရှိကြပြီ။ ကိုဖေဝင်းက အိမ်ထောင်အတွက် စီးပွားကိုပဲ ကြုံးရှာပြီး တစ်သက်လုံး ရိုးရိုးသားသား နေလာခဲ့တဲ့သူပါ။

အဲဒါကြောင့်လည်း မမြသွေးဟာ သူများလင်ယောက်ျားတွေ နည်းအမျိုးမျိုးနဲ့ ဆိုးသွမ်းကြတာတွေ ကြားရသိရလေ ချစ်လင် ကိုဖေဝင်းကို ပိုပြီးကြည်ညိုရလေပဲ။

ပတ်ဝန်းကျင်မှာ အိမ်ထောင်သည်ယောက်ျားတွေ တစ်မျိုးမဟုတ်တစ်မျိုး ဆိုးသွမ်းကြတဲ့ သတင်းတွေက အမြဲပဲကြားနေရတာပါ။
သူငယ်ချင်းတွေဖြစ်တဲ့ မခင်ဝေတို့၊ မသီတာတို့အဖြစ်က အခုရက်ပိုင်းအတွင်းမှာ ဖြစ်ခဲ့ကြတာ။ တခြား မိတ်ဆွေသူငယ်ချင်းတွေထဲက လင်ယောက်ျားရဲ့ဆိုးမျိုးကို နည်းအမျိုးမျိုးနဲ့ ခါးစည်းခံနေရတာတွေက မနည်းလှဘူး။



လမ်းထိပ်က မိန်းမဆိုရင် ညတိုင်း ယောက်ျားရဲ့ အရိုက်အနှက်ကို ခံရတယ်။ ဘာမှလည်း အပြစ်ရှိလို့ မဟုတ်ဘူး။ သူ့ယောက်ျားက ညတိုင်း အရက်မူးအောင်သောက်လာပြီး မူးလာရင် အပြစ်မရှိအပြစ်ရှာ နှိပ်စက်တော့တာပဲ။ ဒီမိန်းမမှာ ဝဋ်ခံနေရသလိုပါပဲ။ ညရောက်မှာတောင် ကြောက်ကြောက်နေရတယ်ဆိုပဲ။ ကလေးလေးယောက်နဲ့ အိမ်ထောင်သက် ဒါလောက်ကြာမှ ကွဲလို့ကွာလို့ကလည်း မဖြစ်။ ကိုယ်တိုင်လည်း လုပ်ကိုင်မစားတတ်နဲ့။ ဒါမျိုးတွေ အများကြီးရှိပါတယ်။ ဒီမိန်းမအဖြစ်ကိုတော့ အိမ်ချင်းနီးလို့ နေ့တိုင်း ကြားနေမြင်နေရတာလေ။

တစ်လမ်းခြားက ဆိုက်ကားသမား လင်မယားအဖြစ်ကိုလည်း ကြည့်ဦး။ လူကဖြင့် ဆိုက်ကားနင်းစားရတယ်။ ကလေးက ခြောက်ယောက်၊ ကလေးတွေ ကျောင်းမထားနိုင်လို့ မိခင်ကလေးအသင်းက ကျောင်းထားပေးရတယ်။ ဒါကို သူက မယားငယ်နဲ့တဲ့။ မယားငယ်ကို အိမ်ခေါ်လာလို့ မယားကြီးက သူ့ယောက်ျား ဆိုက်ကားဆရာရော၊ မယားငယ်မကိုပါ ဆဲဆိုရိုက်နှက်လိုက်တာ တစ်ရပ်ကွက်လုံး ပွက်ပွက်ညံသွားပါရောလား။ မမြသွေးမှာ အံ့သြလို့ မဆုံးတော့ဘူး။

စီးပွားရေး ပြေလည်ရင်လည်း ပြေလည်တဲ့အလျောက်၊ မပြေလည်ရင်လည်း မပြေလည်တဲ့အလျောက် ယောက်ျားတော်တော်များများကတော့ ဆိုးသွမ်းနေကြတာပါပဲ။ ဇနီးမယားတွေကလည်း အောင့်အီးသည်းခံ ပေါင်းသင်းနေရတာပါပဲ။

ဒါမျိုးတွေကိုမြင်ရလေ မမြသွေးက ကိုဖေဝင်းကို လေးစားကြည်ညိုလေပါပဲ။ ကိုယ့်ဘဝကိုယ်လည်း ကျေနပ်မိတယ်။
ညီမဝမ်းကွဲတစ်ယောက်က ဖုန်းဆက်ခေါ်တယ်။ မမမြလာခဲ့ပါဦး၊ အရေးကြီးလို့ပါဆိုလို့ သားမက်ကလေးကို ညီမအိမ် ဆိုင်ကယ်နဲ့ လိုက်ပို့ခိုင်းရတယ်။ ဟိုရောက်တော့မှ အကြောင်းစုံသိလိုက်ရတော့ မမြသွေး ရင်မောသွားရပါတော့တယ်။

ညီမယောက်ျား မောင်အေးဆောင် အရိုက်ခံရလို့တဲ့။ ဖြစ်ပုံက ကာရာအိုကေပါတဲ့ စားသောက်ဆိုင်ကို မောင်အေးဆောင်က သွားနေကျ။ ညတုန်းကတော့ သီချင်းဆိုတဲ့ အဆိုတော်မလေးကို ပန်းကုံးဆုချရင်းက တစ်ခြားဝိုင်းက လူငယ်တွေနဲ့ ရန်ဖြစ်ကြတယ်တဲ့။ ရန်ဖြစ်ကြပုံကလည်း ဆိုင်အပိတ်မှာ အဲဒီမိန်းကလေးကို ခေါ်ထုတ်ဖို့ကြိုးစားတော့ လုကြယက်ကြရင်း ရန်ဖြစ်တာတဲ့လေ။ အဲဒါမှာ တစ်ဖက်နဲ့တစ်ဖက် ရိုက်ကြနှက်ကြရင်း မောင်အေးဆောင် ခေါင်းကွဲသွားတယ်။ အဲဒီလောက်အထိက ကိစ္စမရှိသေးပါဘူး။ ဆိုင်ကပစ္စည်းတွေ ကွဲလို့ရှလို့ ဆိုင်ရှင်က ဖုန်းဆက်လိုက်တာနဲ့ ရဲတွေရောက်လာပြီး နှစ်ဖက်စလုံးကို ဖမ်းသွားကြတယ်တဲ့လေ။ မောင်အေးဆောင် ညကအချုပ်ထဲမှာ အိပ်လိုက်ရတာပါ။

အခုနေ့လည်မှ ညီမဖြစ်သူ ဖုန်းဆက်ခေါ်တာက သူ့ယောက်ျားအာမခံရဖို့ကိစ္စလုပ်ဖို့ သူတစ်ယောက်တည်း မလုပ်တတ်မကိုင်တတ်နဲ့မို့ မမြသွေးကို လှမ်းခေါ်အကူအညီတောင်းတာပါ။

မမြသွေးလည်း ဒီလိုရုံးပြင်ကနားကိစ္စ ဘာနားလည်မှာလဲ။ ကိုဖေဝင်းကိုပဲ ဆိုင်ကိုဖုန်းဆက်ပြီး လှမ်းခေါ်ရတာပေါ့။ ကိုဖေဝင်းရောက်လာမှ သက်ဆိုင်ရာကိုလိုက်ပြီး လုပ်ကိုင်ပေးလို့ မောင်အေးဆောင် အာမခံရသွားတယ်။

“မမမြရယ်... သူ ဒီလိုခြေပုန်းခုတ်နေတာ ဘယ်လောက်ကြာပြီလဲ မသိပါဘူး။ သက်ကတော့ ရိုးရိုးတန်းတန်း သောက်စားလာတယ်လို့ပဲ ထင်မိတာလေ။ အခုလိုဖြစ်မှ ကာရာအိုကေဆိုင်သွားပြီး ကောင်မတွေနဲ့ ရှုပ်နေတာ ဗူးပေါ်သလို ပေါ်တော့တယ်။ ကောင်းကြသေးရဲ့လား”

သက်သက်က မောင်အေးဆောင်ကိုရှေ့ထားပြီး မမြသွေးတို့ လင်မယားကို ငိုရင်းက ရင်ဖွင့်လိုက်ပါတယ်။ မောင်အေးဆောင်ကတော့ ခေါင်းကြီးငိုက်စိုက်ချလို့။ ကိုဖေဝင်းကတော့ သက်သက် ကျေနပ်အောင် ယောက်ဖတစ်ဝမ်းကွဲကို ဆုံးမစကားပြောခဲ့ပါတယ်။

မမြသွေးကတော့ သက်ပြင်းကိုသာ ချမိပါတော့တယ်။

သည်ကြားထဲ... တူတွေ ဆိုးကြသွမ်းကြတဲ့ကိစ္စကို ကြားရသေးတယ်။ မမြသွေး အစ်မအကြီးဆုံးက ယောက်ျားလေးချည်း သုံးယောက် မွေးထားတာပါ။ အားလုံးအရွယ်ရောက်နေကြပြီ။

တစ်နေ့တော့ အစ်မကြီး မမြသွေးဆီရောက်ချလာတယ်။

“မြသွေးရေ... မောင်ဖေဝင်းကိုခေါ်ပြီး ငါ့ကူပါဦးဟဲ့၊ ညီးတူတစ်ယောက်က ဒုက္ခပေးပြန်ပြီအေ”

“ဘာဖြစ်လို့လဲ မမကြီး”

“ဇေယျာကိုလေ၊ နံပါတ်ဖိုးထိုးတာတဲ့၊ ဆေးထိုးရက်တန်းလန်းကြီး ရဲကမိလို့ အခု အချုပ်ထဲမှာ...”

“အို...”

“သူ့သူငယ်ချင်းတွေလည်းပါတယ်၊ ငါလည်း ဘာမှမလုပ်တတ်ဘူး၊ မောင်ဖေဝင်းကိုပြောပါဦး”

အစ်မကြီးကမုဆိုးမပါ။ သားသုံးယောက်က တစ်ယောက်တစ်မျိုး မရိုးရအောင်ဆိုးနေတော့ အမြဲဗျာများနေရရှာတဲ့ အမေတစ်ယောက်ပေါ့။ မုဆိုးမဆိုတော့ ခုလိုကိစ္စမျိုးဖြစ်လာတော့လည်း ပေါက်ပေါက်ရောက်ရောက်ရှိတဲ့ ကိုဖေဝင်းကိုပဲ အားကိုးရတော့တာပါပဲ။

“မြသွေး သိသလောက်တော့ ဒီအမှုမျိုးက အာမခံမရဘူး မမကြီး”

“ဒါတော့ ဒါပေါ့အေ... အပြစ်ပေါ့လျော့အောင် လုပ်ဖို့ကိုင်ဖို့ သူက ဥပဒေနားလည်တယ်လေ၊ သူ့မှာ ရှေ့နေရှေ့ရပ် အသိမိတ်ဆွေတွေလည်း ရှိတာပဲ၊ ဒါကို ငါကပြောတာပါ”

“ဟုတ်ကဲ့ပါ မမကြီး၊ ကိုဖေဝင်းကိုခေါ်ပြီး မြသွေး ညနေကျလာခဲ့ပါ့မယ်”

“ငါ့မလဲ ဒီသားသုံးကောင်နဲ့ ဒုက္ခပါပဲမြသွေးရယ်၊ တစ်ယောက်ကလည်း အရက်သမား၊ အခု အငယ်ဆုံးကောင်ကလည်း သောက်တတ်နေပြီလေ၊ ညီး သမီးမိန်းကလေးမွေးထားတာ ကံကောင်းတယ်အေ၊ ယောက်ျားလေးတွေကတော့ တစ်ခုမဟုတ်တစ်ခု ဆိုးကြသွမ်းကြတာပဲ၊ သားဆိုးအမေ တပေပေတဲ့၊ ငါ့သာကြည့်တော့”

မမကြီးပြောသွားတဲ့စကားကို မမြသွေး လက်မခံနိုင်ပါဘူး။ မမြသွေးပတ်ဝန်းကျင်မှာတွေ့နေရတဲ့ ယောက်ျားတော်တော်များများ တစ်နည်းမဟုတ်တစ်နည်းနဲ့ ဆိုးကြတာမှန်ပါတယ်။ မမကြီးပြောသလို ယောက်ျားလေးမှန်သမျှ တစ်ခုမဟုတ်တစ်ခု ဆိုးသွမ်းကြတယ် ဆိုတာကိုတော့ လက်မခံနိုင်ပါဘူး။

ဘာဖြစ်လို့လဲဆိုတော့ ဒီအထဲမှာ ကိုဖေဝင်း မပါလို့လေ။ ကိုဖေဝင်းကတော့ စံပြယောက်ျားတစ်ယောက်ပါ။



မမြသွေးနဲ့ ကိုဖေဝင်းနဲ့က မိဘတွေစပ်ဟပ်ပေးစားလို့ ညားခဲ့ကြတဲ့ လင်မယားပါ။ ဒါပေမယ့် ကိုဖေဝင်းဟာ မမြသွေးကို မိဘပေးစားလို့သာ ယူခဲ့ရပေမယ့် ကြင်နာရှာပါတယ်။ ချစ်ရှာပါတယ်။ လင်ယောက်ျားတာဝန် ကျေပွန်လှပါတယ်။ အိမ်ထောင်သက်တလျှောက်လုံး ကိုဖေဝင်းဖက်က ပျက်ကွက်ခဲ့တာ၊ ဖောက်ပြားခဲ့တာ တစ်ခုမှ မရှိခဲ့ပါဘူး။ အကျင့်စာရိတ္တအရာမှာတင် စံပြဖြစ်တာ မဟုတ်ပါဘူး။ ကိုဖေဝင်းဟာ ဆေးလိပ်မသောက်တတ်၊ ကွမ်းမစားတတ်၊ အရက်မသောက်တတ်တဲ့ ယောက်ျားတစ်ယောက်ပါ။ ဖဲနဲ့လောင်းကစားကတော့ ဝေးရောပဲ။

ဒါတွေအတွက် မမြသွေး ဂုဏ်ယူတယ်။ ကိုဖေဝင်းကိုကြည့်လိုက်ရင် အမြဲတမ်း သပ်သပ်ရပ်ရပ် သန့်သန့်ပြန့်ပြန့်နဲ့ သူ့ကိုယ်သူ သားနားအောင်နေတတ်သလို လူပုံကလည်း နဂိုခန့်ချော ချောတဲ့လူပါ။ အခု အသက်ငါးဆယ်နီးတဲ့အထိ ကိုဖေဝင်းက သပ်သပ်ရပ်ရပ် ရှိတုန်းပဲ။ ချောတုန်းပဲ။ အသက်ကြီးပေမယ့် ယောက်ျားတိုင်းလိုလို ဖြစ်လေ့ရှိတဲ့ ဆံပင်ပါးတာ၊ ဗိုက်ထွက်တာမျိုး မရှိသေးပါဘူး။ ကိုဖေဝင်းကို အိမ်ထောင်သည်မှန်း သိပေမယ့် ကျတဲ့မိန်းမတွေ အပုံကြီးရှိပါတယ်။ ဒါတွေကို ကိုဖေဝင်းက စိတ်မဝင်စားပါဘူး။ အဲဒါကြောင့်လည်းမမြသွေးက ကိုဖေဝင်းကို စိတ်ချတယ်။

မမြသွေးနဲ့ အိမ်ထောင်ကျခါစက ကိုဖေဝင်းက ဝန်ထမ်းပါ။ ဘဏ္ဍာရေးဌာနမှာ အထက်တန်းစာရေးပဲ ရှိပါသေးတယ်။ အိမ်ထောင်ကျပြီး မကြာဘူး အထက်အညာကို ပြောင်းရတယ်။ မမြသွေး လိုက်သွားတယ်။ အဲဒီမြို့မှာ သုံးနှစ်ကြာအောင် နေခဲ့ရတယ်။ သမီးကို အဲဒီမြို့မှာ မွေးခဲ့တာပေါ့။

အသက်လေးဆယ်မှာ ဝန်ထမ်းအလုပ်က ထွက်လိုက်ပါတယ်။ ကိုယ်ပိုင်အလုပ်ပဲ လုပ်တော့မယ်ဆိုတဲ့ ဆုံးဖြတ်ချက်နဲ့ပေါ့။
မြို့ထဲက ဆိုင်ခန်းတစ်ခုကိုငှားပြီး မိတ္တူကူးဆိုင်လေးဖွင့်တယ်။ အောင်မြင်ပါတယ်။ ဆိုင်နားမှာ အစိုးရရုံးတွေရှိတယ်။ တက္ကသိုလ်ကျောင်းကြီး တစ်ခုလည်းရှိလို့ အလုပ်ကတွင်ကျယ်တယ်လေ။

တစ်နှစ်မပြည့်ခင်မှာ မိတ္တူကူးစက် နောက်နှစ်လုံးထပ်ဝယ်ပြီး တိုးချဲ့ခဲ့ရတယ်။ ပြီးတော့ ကွန်ပျူတာ စာစီစာရိုက်ပါ တွဲလုပ်မယ်ဆိုပြီး ကွန်ပြူတာတစ်လုံးဝယ် စာရိုက်မယ့်လူ တစ်ယောက်ငှားပြီး လုပ်တော့လည်း အောင်မြင်တာပဲ။

အခုဆို ကိုဖေဝင်းရဲ့ ကွန်ပျူတာစာစီစာရိုက်နဲ့ မိတ္တူကူးဆိုင်ဟာ ဘေးခန်းကိုပါ ထပ်ငှားတိုးချဲ့ပြီးဖွင့်ရတဲ့ ဆိုင်ကြီးတစ်ခုဖြစ်နေပြီ။ ကွန်ပျူတာငါးလုံး၊ မိတ္တူကူးစက်ငါးလုံး၊ ဝန်ထမ်းလူငယ် ဆယ့်နှစ်ယောက်နဲ့ လည်ပတ်နေရတဲ့ ဆိုင်ကြီးတစ်ခုဖြစ်နေပါပြီ။ အလုပ်တွင်ကျယ်လွန်းလို့ ကိုဖေဝင်းမှာ အိမ်ကိုတောင် မပြန်နိုင်တော့ပါဘူး။ ဌာနဆိုင်ရာတွေက အပ်တဲ့စာတွေ၊ တက္ကသိုလ်က စာတမ်းတွေ၊ အစည်းအဝေးနဲ့ နှီးနှောဖလှယ်ပွဲ၊ စာတမ်းဖတ်ပွဲတွေအတွက် ဆလိုက်ရှိုးတွေကအစ လုပ်ပေးရတာဆိုတော့ ညပိုင်းအထိပါ အလုပ်က လုပ်ရတယ်။

အိမ်အတွက်လည်း စိတ်ချနေရပြီ။ သမီးအိမ်ထောင်ကျပြီး သမီးတို့လင်မယားက အိမ်မှာပဲနေတယ်။ အိမ်အတွက် စိတ်ပူစရာ ငဲ့ကြည့်စရာ မလိုဘူးဆိုတော့ ကိုဖေဝင်း ဆိုင်မှာပဲ နေလိုက်တော့တာပါ။ မမြသွေးတို့အိမ်က မြို့သစ်မှာဆိုတော့ ဆိုင်ရှိတဲ့မြို့ထဲနဲ့ လှမ်းတယ်လေ။ ကိုဖေဝင်းက တစ်ပတ်မှ တစ်ခါနှစ်ခါလောက်ပဲ အိမ်ကို အလည်သဘော ပြန်လာတော့တယ်။ ဆိုင်မှာပဲစား၊ ဆိုင်မှာပဲအိပ်နေတော့တယ်။
မမြသွေးလည်း ဘာတာဝန်မှမရှိတော့ တစ်ခါတစ်ရံ ရိပ်သာဝင်၊ တရားထိုင် လုပ်နိုင်နေပါတော့တယ်။ မမြသွေးတို့အရွယ် တစ်ချို့ စားဝတ်နေရေး ရုန်းကန်ရတုန်းပေမယ့် မမြသွေးဘဝကတော့ အေးအေးဆေးဆေးပါ။

ဒီလိုနေနိုင်တာဟာ ကိုဖေဝင်းကြောင့်ပဲ။ စီးပွားရေး အောင်မြင်ရုံ ငွေရှာနိုင်ရုံကြောင့်ရယ် မဟုတ်ပါဘူး။ အသောက်အစားကင်းကင်းနဲ့ မဖောက်မပြား နေနိုင်တဲ့အတွက် ကိုယ့်လင်သားကို မမြသွေးကြည်ညိုမိတယ်။ လေးစားမိတယ်။ ကျေးဇူးတင်မိရပါတယ်။

ဒါကြောင့် မမကြီးပြောသွားတဲ့ “ယောက်ျားလေးမှန်သမျှ တစ်ခုမဟုတ်တစ်ခု ဆိုးသွမ်းကြတယ်”ဆိုတဲ့ စကားကို မမြသွေးက လက်မခံနိုင်တာပါ။ စီးပွားရေးအောင်မြင်ပြီး ငွေရှာနိုင်ပေမယ့် ပျက်စီးမှု လမ်းကြောင်းထဲမရောက်တဲ့ ကိုဖေဝင်းလို လူစားမျိုးလည်း ရှိပါသေးတယ်လေ။

ကိုဖေဝင်းက မိန်းမတွေနဲ့ ကင်းကင်းရှင်းရှင်းပဲ နေပါတယ်။ မမြသွေးက ဘွဲ့ရပြီး အလုပ်မရှိသေးတဲ့ တူမတစ်ယောက်ကို ကိုဖေဝင်းဆိုင်မှာ အလုပ်ပေးဖို့ ပြောတော့တောင် “ကိုယ့်ဆိုင်က ယောက်ျားလေး ဝန်ထမ်းတွေချည်းပဲမြ၊ မိန်းကလေးထည့်လိုက်ရင် အရှုပ်အရှင်းတွေ ဖြစ်လာလိမ့်မယ်၊ အဲဒီလိုဖြစ်မှာစိုးလို့ပဲ ယောက်ျားလေးတွေ ခန့်ထားတာ” လို့ပြောပြီး ငြင်းခဲ့သေးတယ်။

ဟုတ်ပါတယ်။ အလုပ်ကျလာရင် ညအိပ်ပြီးတော့လည်း လုပ်ချင်လုပ်ရတာဆိုတော့ ယောက်ျားလေးတွေချည်း ခန့်ထားတာ ကောင်းတာပေါ့။ ညရေးညတာ ခိုင်းရင်လည်းရတယ်။ မမြသွေးအတွက်လည်း မိန်းမတွေနဲ့ ပတ်သက်ပြီး ကိုဖေဝင်းအတွက် ပူပန်စိုးရိမ်နေစရာ မလိုတော့ဘူးပေါ့။ ပြောသာပြောရတယ် မမြသွေးက ကိုဖေဝင်းကို စိတ်ချပြီးသားပါ။

အမျိုးတွေ အားလုံးကလည်း ဘာကိစ္စလေးဖြစ်ဖြစ် ကိုဖေဝင်းကိုပဲ အားကိုးကြတယ်။ ကိုဖေဝင်းကမှ ရုံးပြင်ကနားကိစ္စ၊ လူကြီးသူကြီးနဲ့ ပြောဆိုဆက်ဆံရမယ့် ကိစ္စတွေကို နားလည်တာလေ။ ဘယ်လိုကိစ္စမျိုးဆို ဘယ်သူ့ဆီသွားရမယ်၊ ဘယ်လိုဝင်ထွက်ရမယ်၊ ဘယ်လိုစကားမျိုး ပြောရမယ်ဆိုတာ ကိုဖေဝင်းနားလည်တယ်။ ဒီတော့ ဆွေမျိုးတွေ အားလုံးကလည်း ကိုဖေဝင်းကို အားကိုးကြတယ်။

ကဲ- ဘယ်မှာလဲ။ မမကြီးပြောသလို ယောက်ျားလေးမှန်သမျှ တစ်ခုမဟုတ်တစ်ခု ဆိုးကြတာပဲဆိုတာ။ ကိုဖေဝင်းနဲ့ကျ ဘယ်မှာ မှန်လို့လဲ။

တစ်နေ့တော့ ညကြီးမင်းကြီး ဖုန်းဝင်လာတယ်။ ညကိုးနာရီတောင်ရှိနေပါပြီ။

ဆေးရုံကြီးကနေ ဖုန်းဆက်တာပါ။ ရေနံချောင်းက အမျိုးထဲက ဘကြီးတစ်ယောက် အသည်းအသန်းဖြစ်လို့တဲ့။ မန္တလေးကို ဆေးရုံလာတက်ရတယ်တဲ့။ အဲဒါ မမြသွေး လာခဲ့ပါဦးတဲ့။

အဲဒီဘကြီးက မမြသွေးတို့အတွက် ကျေးဇူးမကင်းရုံမကဘူး၊ အမေ့ရဲ့ အစ်ကိုအရင်းမို့ မမြသွေးလည်း ဖုန်းရရချင်း ဆေးရုံကြီးကိုပြေးဖို့ ပြင်ရပါတော့တယ်။

ဖြစ်ချင်တော့ ဒီနေ့မှ သူတို့ကုမ္ပဏီကလွှတ်လို့ သားမက်ကလေးက နယ်ကိုခရီးထွက်နေရတယ်။ အိမ်မှာမရှိဘူး။ မမြသွေးလည်း သမီးနဲ့မြေးကို ထားခဲ့ပြီး အိမ်ဘေးက ကောင်လေးကိုပဲ ဆေးရုံလိုက်ပို့ဖို့ အကူအညီတောင်းရတော့တယ်။

“အန်တီ့ကို ဆေးရုံကြီးလိုက်ပို့စမ်းပါ မောင်ရာဇာရယ်၊ အန်တီ ဆီထည့်ပေးပါ့မယ်”

“ရပါတယ်အန်တီ၊ ဆိုင်ကယ်ထဲမှာ ဆီအပြည့်ရှိပါတယ်”

မောင်ရာဇာဆိုတဲ့ ကောင်လေးက လိုက်ပို့ရှာပါတယ်။

ဆေးရုံကြီးကို တိုက်ရိုက်မသွားသေးပဲ ကိုဖေဝင်းကိုဝင်ခေါ်ဖို့ မမြသွေးဆုံးဖြတ်လိုက်တယ်။

ကိုဖေဝင်းဆိုင်နဲ့ ဆေးရုံကြီးနဲ့က မဝေးတော့ဘူးလေ။

မောင်ရာဇာ့ကို ကိုဖေဝင်းဆိုင်ကို အရင်မောင်းခိုင်းလိုက်ပါတယ်။

ကိုဖေဝင်းဆိုင်ရှေ့ရောက်တော့ ဝန်ထမ်းလူငယ်တစ်ယောက်ကို ကွန်ပျူတာနဲ့ အလုပ်လုပ်နေတာတွေ့ရတယ်။ ဆိုင်ထဲမှာတော့ ကိုဖေဝင်း မရှိဘူး။ ဆိုင်ရှေ့မှာ ကိုဖေဝင်းဆိုင်ကယ် ရပ်ထားတာမို့ အထပ်ခိုးပေါ်မှာ နားနေမယ်ဆိုတာ မမြသွေးသိလိုက်ပါတယ်။
မမြသွေးက အထပ်ခိုးပေါ်တက်တဲ့ လှေကားပေါ် တန်းတက်သွားလိုက်တယ်။

“အန်တီ... အန်တီ...”

ကွန်ပျူတာလုပ်နေတဲ့ လူငယ်က မမြသွေးကို ဟန့်တားသလိုနဲ့ လှမ်းခေါ်လိုက်တာကို မမြသွေးက “မင်းဦးလေး အပေါ်မှာမဟုတ်လား၊ ဆေးရုံကြီး သွားစရာရှိလို့ လာခေါ်တာဟေ့” ပြန်ပြောပြီး အထပ်ခိုးပေါ်ကို တက်လာခဲ့ပါတယ်။

မမြသွေးဟာ အထပ်ခိုးပေါ်ကနေ ဝရုန်းသုန်းကား ပြန်ဆင်းပြေးခဲ့ပါတယ်။ အထပ်ခိုးပေါ်မှာ မြင်ခဲ့ရတဲ့ မြင်ကွင်းက မမြသွေး နှလုံးသွေးကိုရော ဦးနှောက်ကိုပါ ဆူဝေပြာမိုက်သွားစေတယ်။

မမြသွေး တက်အသွားမှာ ရုန်းရင်းဆန်ခတ် ဖြစ်သွားတဲ့အသံ၊ ထပ်ခိုးကြမ်းပြင်ကနေ ကမန်းကတန်း ထထိုင်လိုက်တဲ့ ကိုဖေဝင်းနဲ့ ဆိုင်က ဝန်ထမ်းလူငယ်လေးတစ်ယောက်၊ ကိုဖေဝင်းရဲ့ ထိတ်လန့်အံ့သြတဲ့မျက်နှာ၊ သာမန်အတိုင်းမဟုတ်ပဲ ဖွေးဆွတ်နေတဲ့ ကိုဖေဝင်းရဲ့ မျက်နှာ၊ အင်္ကျီကိုယ်ချွတ်နဲ့ ပုဆိုးပြင်ဝတ်လိုက်တဲ့ ဆိုင်ကဝန်ထမ်းလူငယ်လေး။

အဲဒီမြင်ကွင်းတွေကို ကျောခိုင်းပြီး မမြသွေး အထပ်ခိုးပေါ်က ခြေချော်မကျရုံတမယ် ပြေးဆင်းခဲ့တယ်။

အောက်မှာ ကွန်ပျူတာထိုင်ရိုက်နေတဲ့ လူငယ်က စိုးထိတ်ကြောက်ရွံ့တဲ့ပုံနဲ့ ပါးစပ်အဟောင်းသား ဖြစ်ကျန်ခဲ့တယ်။

မမြသွေးကတော့ ဆိုင်ရှေ့အရောက် အပြေးထွက်လာခဲ့ပါတယ်။

မောင်ရာဇာ့ ဆိုင်ကယ်နားရောက်ခါနီးမှ ဣနြေ္ဒဆည်ဖို့ သတိရပြီး မျက်နှာမပျက်အောင် ထိန်းချုပ်လိုက်ရတယ်။

“မင်းဦးလေး မရှိဘူးမောင်ရာဇာ၊ မောင်း... မောင်း... ဆေးရုံကြီးကိုသာ မောင်းတော့”

သတိထားပြောလိုက်တဲ့ကြားက မမြသွေးအသံတွေဟာ တုန်နေပါတယ်။

အခုဆို မမြသွေး တရားစခန်းမှာ ရောက်နေတာ တစ်လပြည့်တော့မယ်။ ကိုဖေဝင်းအဖြစ်ကို မြင်ခဲ့ရပြီး နောက်တစ်နေ့မနက်မှာပဲ မမြသွေး ဒီရိပ်သာကို လာခဲ့တာပါ။ ဒီတရားစခန်းက ထွက်ရင်လည်း အိမ်ပြန်ဖို့ စိတ်မကူးပါဘူး။ နောက်ထပ် ရိပ်သာတစ်ခုပြောင်းပြီး တရားထိုင်ဖို့ စိတ်ကူးထားပါတယ်။

မမြသွေး အိမ်မပြန်ချင်ဘူး။ ကိုဖေဝင်းနဲ့လည်း မျက်နှာချင်း မဆိုင်ချင်ဘူး။ သူနဲ့ဘယ်လို မျက်နှာချင်းဆိုင်ရမှန်းလဲ မသိဘူး။ ဒီကိစ္စကို ရင်ဆိုင်ဖြေရှင်းဖို့ အင်အားလည်း မမြသွေးမှာ မရှိပါဘူး။

ကိုဖေဝင်း အိမ်ကိုပြန်လာသေးလား။ မလာဘူးလားဆိုတာလည်း မမြသွေး မစုံစမ်းမိဘူး။ အိမ်ကသမီးကလည်း မမြသွေးတရားစခန်း ဝင်နေကျမို့ ထုံးစံအတိုင်း သွားတယ်လို့ပဲ ထင်နေမှာပါ။

မမြသွေးအနေနဲ့ ဒီဖြစ်ရပ်ကြီးကို ဘယ်သူ့ကိုရော ရင်ဖွင့်လို့ ရမှာလဲ။ ဘယ်သူ့ကိုမှ ဖွင့်မပြောရဲတဲ့ ကိစ္စမျိုးကြီးပါ။
တရားထိုင်ရင်းက ဟိုတစ်ညမှာ မြင်ခဲ့ရတဲ့ ကိုဖေဝင်းရဲ့ မိတ်ကပ်တွေလိမ်းထားလို့ ဖွေးဆွတ်နေတဲ့ မျက်နှာကြီး စိတ်ကူးထဲမှာ ပေါ်ပေါ်လာတိုင်း မမြသွေး ရင်တွေတုန်နေမိတယ်။

ကိုဖေဝင်း ဒီလိုဖြစ်နေတာ ဘယ်လောက်ကြာပြီလဲ။ ဘယ်တုန်းကတည်းကလဲဆိုတာ စဉ်းစားမရဘူး။
ဒီလိုလူစားမျိုးတွေ ရှိတယ်ဆိုတာ မမြသွေးကြားဖူးနားဝ ရှိပါတယ်။ ဒါပေမယ့် ကိုယ့်ယောက်ျားကို ဒါမျိုးဖြစ်နေလိမ့်မယ်လို့ ဘယ်ထင်မိပါ့မလဲ။

ကိုဖေဝင်းကလည်း ပိရိပါပေ့။ လုံခြုံပါပေ့။

ဒီလိုလူစားမျိုးတွေဟာ ဒီလိုပဲ သူတို့ဘဝမှန်ကို မသိအောင် ထိန်းချုပ်ဖုံးကွယ် နိုင်ကြတယ်ထင်ပါရဲ့။ ဟန်ဆောင်ကောင်းလွန်းကြတယ် ထင်ပါရဲ့။

သြော် အဲဒါကြောင့်လည်း ကိုဖေဝင်းတို့လို ကိုယ့်ဘဝကိုယ် ဖုံးကွယ်ပြီး ဟန်ဆောင်ကောင်းတဲ့ လူတွေကို “အပုန်း” လို့ ခေါ်ကြတာကိုး။

                                                            ဆောင်းလုလင်
                                                             နိုဝင်ဘာလ ၁၀ ရက်နေ့၊ ၂၀၁၁ ခုနှစ်။

No comments: