ဆောင်းလုလင်- ရင်ခွင်ဝေးမှတ်စု (၀တ္ထုတို)

ဆောင်း လု လင်

ရင်ခွင်ဝေးမှတ်စု

တူကိုကိုင်ထားတဲ့ကျွန်မလက်တွေဟာတုန်လှုပ်နေတယ်၊

သူကတော့ နှစ်နှစ်ချိုက်ချိုက် အိပ်ပျော်လို့ပါပဲ။ ကျွန်မ ဆုံးဖြတ်ထားတဲ့အတိုင်း သူ့ခေါင်းကို တူနဲ့ထုချလိုက်ရမလား။

အိပ်ပျော်နေသူတစ်ယောက်ကို တစ်ဖက်သတ်အနိုင်ယူပြီး သတ်ပစ်ရမှာတော့ မတရားလှပါဘူး။ ပြီးတော့ ကျွန်မသတ်ပစ် ဖို့ကြံစည်နေတဲ့သူက ကျွန်မခင်ပွန်း၊ကျွန်မယောက်ျားဖြစ်နေပြန်တယ်။

ကျွန်မဟာ တုန်လှုပ်တဲ့လက်တွေနဲ့ တူကြီးကိုကိုင်ရင်း ဇဝေဇဝါနဲ့ စိတ်တွေချောက်ချားနေမိပါတော့တယ်။

နောက်ဆုံးတော့ နာကျည်းစိတ်နဲ့ဒေါသတွေကတွန်းပို့ လို့ ကျွန်မဟာ ဆုံးဖြတ်ချက်ကို ရုတ်တရက်ချလိုက်ပါတော့တယ်။ သူ ကျွန်မအပေါ်မှာရက်စက်ခဲ့တာတွေများပြီ။ ဒါကို ကျွန်မ ဆက်သည်းမခံနိုင်တော့ဘူး။ ဒီစိတ်ဝေဒနာတွေကရုန်းထွက်ဖို့ဟာ တစ်နည်းပဲရှိတော့တယ်။ အဲဒါကတော့ သူ လူအဖြစ်အ သက်ဆက်ရှင်မနေဖို့ပဲ။

စိတ်နာကျည်းဖွယ်သူ့လုပ်ရပ်တွေကို ပြန်တွေးမိတော့ ကျွန်မရဲ့ဆုံးဖြတ်ချက်ဟာ ပီပြင်သွားပါပြီ။

ကျွန်မဟာ တူကိုင်ထားတဲ့လက်ကိုမြှောက်လိုက်တယ်။

လေးလံလှတဲ့တူကြီးကို လက်နှစ်ဖက်အားစိုက်မရင်းက အိပ်နေတဲ့ သူ့ဦးခေါင်းကို မျက်စိစုံမှိတ်လို့ အားရပါးရထုချလိုက် ပါတော့တယ်။

အို.. သူ အော်တောင်မအော်နိုင်တော့ပါလား။

ကျွန်မလေ.. သူ့ခေါင်းကို တူနဲ့အဆက်မပြတ်ထုပစ် လိုက်တယ်။ တစ်ချက်ပြီးတစ်ချက်၊ တစ်ချက်ပြီးတစ်ချက်၊ ဆက် တိုက်-ဆက်တိုက်ပဲပေါ့။

အိပ်ပျော်နေတဲ့သူဟာ ဘယ်လိုမှတောင် မတုန့်ပြန်နိုင်ခဲ့ ပါဘူး။ သူ့ကိုယ်သူဘာဖြစ်သွားတောင် သိလိုက်ရဲ့လားမသိ။

သွေးတွေဟာ ကြမ်းပြင်ပေါ်မှာမြင်မကောင်းအောင် စီးကျ နေတော့တယ်။ ဦးခေါင်းခွံထဲက ဦးနှောက်တွေဟာ ဖွေးကနဲထွက် ကျလာတယ်။

သုံးလေးခါလောက် ဆန့်ငင်-ဆန့်ငင်အကြောလိုက်ပြီး နောက်မှာ ငြိမ်သက်သွားပါတော့တယ်။

အို..သူသေပြီပေါ့၊ ကျွန်မချစ်တဲ့မောင်၊ ကျွန်မရဲ့ခင်ပွန်း၊ ကျွန်မလင်၊ ခုတော့ .. သူသေသွားရှာပြီ။

ကျွန်မ ရှိုက်ကြီးတငင်ငိုလိုက်မိတယ်။

သူသေသွားတဲ့အတွက် ဝမ်းနည်းမိသလို၊ ဝမ်းလည်းသာ မိပါတယ်။ သူ အရင်လို တခြားမိန်းမတွေနဲ့မရှုပ်နိုင်တော့ဘူး လေ။ ကျွန်မကိုပစ်ပြီး တခြားမိန်းမတွေနောက်ကိုလိုက်မသွားနိုင် တော့ဘူးလေ။ အိမ်မှန်မှန်ပြန်မလာတဲ့သူ့ကို စိတ်ဆင်းရဲစွာနဲ့ စောင့်မျှော်နေရတဲ့အဖြစ်မျိုး ကျွန်မကြုံရမှာမဟုတ်တော့ပါဘူး။ ဒီအတွက် ကျွန်မဝမ်းသာရမှာပေါ့။

ဟုတ်တယ်၊ သူဟာ ဘယ်မိန်းမနဲ့မှမဆိုင်တော့ဘူး။ ကျွန်မနဲ့ပဲဆိုင်တော့တယ်။ ဘယ်မိန်းမဆီကိုမှ သူမသွားနိုင်တော့ ဘူး။ ကျွန်မအနားမှာပဲ ရှိနေတော့မယ်။ ဟာ-ဟ- ကျွန်မပျော် လိုက်တာ။

ကျွန်မဟာ သူ့အလောင်းကြီးကိုပိုက်ပြီး အားရပါးရငိုပစ် လိုက်တယ်။ ပြီးတော့.. ဟက်ဟက်ပက်ပက် ဟားတိုက်ရယ်မော ပစ်လိုက်တယ်။

ကျွန်မကိုခွင့်လွှတ်ပါမောင်။ ကျွန်မချစ်လွန်းလို့ ဒီလို လုပ်ရတာပါ။

ကျွန်မ သူ့ကို အိမ်နောက်ဖေးပိတောက်ပင်ကြီးအောက် မှာ မြှုပ်ထားလိုက်တယ်။

မောင့်မယားဟာ ကျွန်မတစ်ယောက်ထဲနော်။ ကျွန်မကို ခွင့်လွှတ်ပါမောင်ရယ်၊ ကျွန်မအနားမှာ မောင်အမြဲတမ်းရှိနေ အောင် ဒီလိုကြံစည်မိတာပါ။

သူ့အလောင်းကို မြေကြီးတွေနဲ့ဖုံးအုပ်ရင်း ကျွန်မနှုတ်က တတွတ်တွတ်ရေရွတ်နေမိတော့တယ်။

+ + + + +

ကျွန်မကိုမချောက်ပါနဲ့မောင်ရယ်။ ကျွန်မကြောက်တယ်၊

ကျွန်မတောင်းပန်ပါတယ်မောင်၊ ကျွန်မမောင့်ကိုမမုန်းခဲ့ဖူးဆိုတာ မောင်အသိပါနော်။ သွားပါတော့မောင်။

ကျွန်မမျက်စိထဲမှာ မောင့်ကိုပဲမြင်ယောင်နေမိတယ်။ ဘယ်နေရာကြည့်ကြည့်မောင်၊ အို.. သူ့ကိုသတ်ပစ်လိုက်လို့ အညှိုးတကြီးနဲ့များ ကျွန်မကိုချောက်လှန့်နေပြီလား။ ကျွန်မရင်တွေ တဒိတ်ဒိတ်ခုန်လာတယ်။ ဇောချွေးတွေပြန်လာတယ်၊ မိုးတွေကရော၊ ဘာလို့ ဒီလောက်သည်းသည်းမည်းမည်းရွာနေရတာလဲကွယ်။ မိုးရေကျသံတွေက တဝုန်းဝုန်းတဒိုင်းဒိုင်းမြည်နေတယ်။

ပိန်းပိတ်အောင်မှောင်နေတဲ့ ညအမှောင်ထုကြီးအောက်က အိမ်ကြီးတစ်လုံးထဲမှာ ကျွန်မတစ်ယောက်ထဲ။ တစ်ချက်တစ် ချက်လက်လိုက်တဲ့လျှပ်စီးဟာ နာနာဘာဝကောင်တွေ သွားဖြူကြီးတွေဖြဲပြပြီး ချောက်လှန့်နေသလိုပါလား။

] ကလင်.... ကလင်.... လင်.. လင်.. }

ရုတ်တရက်မြည်လာတဲ့တယ်လီဖုန်းသံကြောင့် ကျွန်မ လန့်သွားတယ်။ ညသန်းကောင်ကြီးလာတဲ့ဖုန်းဟာ ဘယ်ကလဲ၊ ဖုန်းသံက အဆက်မပြတ်မြည်နေတော့ ဖယောင်းတိုင်လေးကို ကိုင်ရင်း တယ်လီဖုန်းရှိရာကို စိတ်ပျက်လက်ပျက်ထသွားရပါ တော့တယ်။

မိုးရွာတဲ့ညမျိုးမှာမှ မီးကပျက်ရတယ်လို့ရှင်။

တယ်လီဖုန်းနားအရောက်မှာ ခပ်ကြမ်းကြမ်းတိုက်လိုက် တဲ့လေကြောင့် ဖယောင်းတိုင်မီးဟာ ဟုတ်ကနဲငြိမ်းသွားတော့ တယ်။ တစ်အိမ်လုံး ပိန်းပိတ်အမှောင်၊

အမှောင်ထုထဲမှာပဲ လက်နဲ့စမ်းရင်း အေးစက်နေတဲ့ တယ်လီဖုန်းခွက်ကို ကောက်ကိုင်လိုက်တယ်၊ ဖုန်းခွက်ကိုနားမှာ ကပ်လိုက်တယ်ဆိုရင်ပဲ...

] အေးလား၊ အခုပြောနေတာမောင်ပါ }

ကျွန်မရဲ့လည်ချောင်းတွေဟာ ရုတ်တရက်ဆို့ပိတ်သွား ရပါတော့တယ်။ ဒါ.. ဒါ…. မောင့်အသံ၊ ကျွန်မအသက်ရှူလို့မရတော့ဘူး။

] အေး၊ မောင့်ကိုစကားပြန်ပြောပါဦး၊ မောင့်ကိုစိတ်ဆိုး နေသလား၊ ဒီတစ်ခါ မောင်နည်းနည်းကြာသွားတယ်အေးရယ်၊ ဒါပေမယ့် နောက်ဆုံးတော့ မောင်-အေးဆီကိုပြန်လာ ရတာပါပဲ ကွယ်၊ မောင့်ကိုခွင့်လွှတ်နော်၊ မောင်ပြန်လာပါရစေအေး }

ဖြတ်ကနဲလျှပ်စီးတစ်ချက်လက်လိုက်ပြီး မိုးချိမ်းသံကြီးဟာ ဝုန်းဝုန်းဒိုင်ဒိုင်းပေါ်ထွက်လာပါတော့တယ်။ ကျွန်မလည်း ကြောက်ကြောက်နဲ့ငယ်သံပါအောင် စူးစူးဝါးဝါးအော်လိုက်မိပြီး တယ်လီဖုန်းကိုလွှတ်ချလိုက်မိတယ်။

မောင့်အသံတွေဟာ တယ်လီဖုန်းထဲက အဆက်မပြတ် ပေါ်ထွက်လာနေဆဲ။

+ + + + +

ကျွန်မကြောက်တယ်၊ အခုတော့ ကျွန်မကြောက်နေရပြီ။

ကျွန်မလုပ်ရပ်တွေမှားခဲ့ပြီလား၊ တမလွန်ဘ၀ကနေ မောင် ကျွန်မကိုလက်စားချေနေပြီပေါ့နော်။ မောင့်ဝိညာဉ်ဟာ မကျွတ်မလွတ်ပဲ၊ ဒီအိမ်ကြီးထဲမှာ လှည့်လည်းပြီး ကျွန်မကိုချောက်လှန့်နေပြီပေါ့။

မောင်ရေ... အမျှ.. အမျှ.. အမျှ..

မောင့်အတွက် အမျှအတန်းဝေပါတယ်မောင်ရယ်။

ကျွန်မဟာ မောင့်ကိုမြှုပ်ထားတဲ့ပိတောက်ပင်အောက်က မြေကြီးတွေကိုဖိသိပ်ရင်းတောင်းပန်နေမိတယ်။ ကျွန်မကိုမချောက်လှန့်ပါနဲ့တော့။ လွတ်ရာကျွတ်ရာကိုသွားပါတော့မောင်ရယ်။

မောင့်အပေါ်သည်းခံခဲ့သမျှ၊ ခွင့်လွှတ်ခဲ့သမျှတွေကို ထောက်ထားပြီး ကျွန်မကိုမနှိပ်စက်ပါနဲ့တော့မောင်။ မောင်ရှိစဉ်က ကျွန်မတတ်နိုင်သမျှမောင့်အပေါ်မှာ သည်းခံခဲ့တာ မောင်အသိပါနော်။

မောင့်ကြောင့် မိဘဆွေမျိုးသားချင်းတွေရဲ့စွန့်လွှတ်ခံခဲ့ ရတာ၊ မောင့်မျက်နှာကြောင့် ကျွန်မဝမ်းနည်းရမှန်းတောင်မသိခဲ့ ဘူးမဟုတ်လားမောင်။

မောင့်အတွက် ဒါလောက်ထိလိုက်လျောခဲ့ပေမယ့် မောင့်ဖက်က ကျွန်မအပေါ် ဘာများပြန်ပြီးပေးဆပ်ခဲ့သလဲ၊ အိမ် ထောင်သက်တလျှောက်လုံး အချိန်မှန်ပြန်မလာတဲ့ လင်ယောက်ျားကိုမျှော်ရင်းမောရတဲ့ဝ္လေနာ။ ဒီဝေဒနာတစ်ခုပဲ ကျွန်မရင်မှာ အဖတ်တင်ကျန်တယ်။

တခြားနည်းတွေနဲ့ ဆိုးချင်သလောက်ဆိုးလိုက်စမ်းပါ၊ မောင်လူမှန်းမသိအောင် အရက်တွေသောက်လာခဲ့စမ်းပါ။ မောင့် အန်ဖတ်တွေကျုံးရင်း ကျွန်မမောင့်ကိုပြုစုပါ့မယ်။

မောင် ဖဲတွေ၊ ဂျင်တွေလောင်းကစားလိုက်စမ်းပါ၊ မွဲတေသွားရင် ကျွန်မဈေးတောင်း ခေါင်းရွက်ပြီးရှာကျွေးပါ့မယ်။

မကောင်းမှုတွေမှန်ပေမယ့် ဒီနှစ်မျိုးကိုတော့ ဘယ်မိန်း မမဆို ကြိတ်မှိတ်သည်းခံနိုင်ကြမှာပါ။

ဒါပေမယ့်မောင်ရယ်.. ကိုယ့်အပြင် တခြားမိန်းမတစ် ယောက်နဲ့ရှုပ်နေတဲ့ လင်သားတစ်ယောက်ကိုတော့ ကျွန်မသာ မဟုတ်ပါဘူး၊ ဘယ်မိန်းမသားကမှခွင့်လွှတ်နိုင်လိမ့်မယ်မထင်ဘူး၊ မောင်ကတော့ တစ်ယောက်ထဲတောင်မဟုတ်ဖူးနော်၊ မောင် တိတ်တိတ်ကလေး ရှုပ်ခဲ့၊ပွေခဲ့၊တွဲခဲ့၊ညားခဲ့တဲ့ မိန်းမပေါင်းဘယ်နှယောက်ရှိပြီလဲ၊ မောင်ပဲသိမယ်။

ကျွန်မကတော့..။ နေ့တစ်နေ့ရဲ့ ညအချိန်ကုန်ဆုံးတဲ့အထိ မောင်ပြန်မလာရင် သောကကြီးစွာနဲ့မျှော်နေမယ်။ လုံဝပြန် မလာတော့တဲ့အခါကျရင်လည်း ဘယ်ကိုစုံစမ်းရမှန်းမသိ၊ ရင် မောစွာနဲ့ပဲ နိုးတဝက်ပျော်တဝက်အိပ်လိုက်ရမယ်။ ကျွန်မက အိမ်မှာသောကတွေတနင့်တပိုးကြီးနဲ့ ကျန်နေရပေမယ့် မောင်ကတစ်ရက်ထဲနဲ့လဲ ပြန်လာချင်မှလာတာနော်။ တစ်ခါတလေ သုံးလေး ရက်ကြာသွားရော၊ ဘယ်ကိုသွားပြီး ဘာတွေလုပ်တယ်ဆိုတာ၊ ကျွန်မသိပါတယ်မောင်၊ မောင်ကရော ဘယ်တုံးကလျှို့ဝှက်ဖူးလို့ လဲ။

] ဟုတ်တယ်၊ မောင်မိန်းမရှုပ်တယ်၊ ဒါမောင့်ဝါသနာ ပဲ၊ ဒါပေမယ့်အေး၊ အေးသိထားဖို့က ဒီကမ္ဘာမှာမောင်အချစ်ဆုံး မိန်းမဟာ အေးပဲ၊ အေးကိုအချစ်ဆုံးမို့ တရားဝင်လက်ထပ်ယူ ထားတာပေါ့၊ အပြင်မှာဘယ်လိုပဲနေနေ၊ နောက်ဆုံးတော့ မောင် အေးဆီပြန်လာမြဲပဲမဟုတ်လားအေးရယ်၊ ကြေနပ်နော် အေး }

ဟင့်အင်း၊ မရဘူး၊ မရဘူး၊ ကြေလည်းမကြေနပ်ဘူး၊ ခွင့်လည်းမလွှတ်နိုင်ဘူး။ ဒါကြောင့် တစ်ခါတော့ မောင် မိန်းကလေးတစ်ယောက်နဲ့ အိမ်တစ်အိမ်မှာအတူရှိနေတုံး ကျွန်မ နောက်ယောင်ခံစုံစမ်းပြီး လိုက်ဖမ်းခဲ့တယ်လေ။ ကျွန်မပဲအရှုံး ပေးခဲ့ရတာပါပဲ၊ ရန်တွေ့နေတဲ့ကျွန်မနဲ့ အစွပ်စွဲခံရတဲ့ဟိုမိန်းက လေးသာ အပြိုင်ငိုကြွေးခဲ့ရတယ်။ မောင်ကတော့ မတုန်မလှုပ်။ အဲဒီညက မောင် ဟိုမိန်းကလေးကို ဣနြေ္ဒမပျက်နှုတ်ဆက်ထားခဲ့ပြီး ကျွန်မနဲ့ပြန်လိုက်လာခဲ့တယ်လေ။ ဒါကို ကျွန်မကကြေနပ်ရမှာလား။ အမှန်မှာတော့ ဟိုမိန်းကလေးကို မောင်စွဲလမ်းတာ မဟုတ်ဖူး၊ မောင့်ဝါသနာအတိုင်း စိတ်ဖြေရုံတွဲတာ။ ကျွန်မလုပ် လိုက်လို့ မောင့်မှာဘာမှနစ်နာမသွားသလို ကျွန်မလည်း ဘာအ ကျိုးအမြတ်မှ မရခဲ့ပါဘူးနော်။

နောင်လည်း မောင်ကတော့ ဝါသနာအတိုင်း ရှုပ်မြဲ၊ တစ်ခုရှိတာက ဘယ်မိန်းကလေးကိုမှ မောင်ကြာရှည်မတွဲဘူး၊ မစွဲလမ်းဘူး။

] မောင်အချစ်ဆုံးဟာအေးပဲ၊ မောင် အေးအပြင် ဘယ်မိန်းမကိုမှအတည်တကျမယူဘူးဆိုတာကိုတော့ အေးယုံပါ ကွယ်၊ လင်ယောက်ျားတစ်ယောက်အနေနဲ့ အေးအပေါ်မှာ မောင် တာဝန်ကျေစေရမယ်၊ မောင်ရှာသမျှဟာအေးအတွက်ပဲ၊ စီးပွားရေး အောင်မြင်တဲ့ယောက်ျားတစ်ယောက်အနေနဲ့ အပျော်အပါးက တော့ရှိမှာပဲအေး }

မောင့်ခံယူချက်က ဒါပဲလား၊ မယားကိုချမ်းချမ်းသာသာ ထားနိုင်ရုံနဲ့ လင့်တာဝန်ကျေပြီလား။ ဘာပဲဖြစ်ဖြစ် မောင့်ခံယူချက်အပေါ်မှာ ကျွန်မစ္လောကတက်ခွင့်မရခဲ့ပါဘူးနော်၊ ကျွန်မ ဘ၀ဟာ မောင်ဖန်ဆင်းထားတဲ့ပုံစံအတိုင်း လည်ပတ်ခဲ့ရတာပါပဲ။

မောင်အိမ်ပြန်လာပြီး ချော့မြှူကြင်နာယုယပြလိုက်ရင် ကြေနပ်ကြည်နူးလို့၊ မောင်အိမ်မှာကြာရှည်ခြေငြိမ်နေရင် မမော နိုင်မပန်းနိုင်ပြုစုပြီး ဝမ်းမြောက်ဝမ်းသာဖြစ်လို့၊ ကျွန်မမှာလေ.. လင်ယောက်ျားလှည့်သမျှ သိသိကြီးနဲ့ခံနေရတဲ့ အရူးမကြီးတစ် ယောက်လိုပါ။

ဒါပေမယ့် မောင်ခြေငြိမ်တဲ့ကာလဟာ ဘယ်လောက်များကြာရှည်တတ်လို့လဲ၊ သွားရင်းလာရင်း တကွေ့ကွေ့ တစ်နေ ရာရာမှာ မိန်းမတစ်ယောက်ယောက်နဲ့ ငြိလာခဲ့မြဲပဲ၊ ရုပ်ရည်ချော မောပြီး အပြောကောင်းတဲ့၊ ပညာတတ်ပြီး စီးပွားအရှာကောင်းတဲ့ မောင့်ကိုရခဲ့တာဟာ ကျွန်မအတွက်တော့ ကံကောင်းတာမဟုတ် ပါဘူး၊ ကံဆိုးတာပါ။

တကယ်တန်းကျတော့ ကျွန်မတစ်ယောက်ထဲမောင်ပြန်အလာကို မျှော်ရင်းမောရတဲ့ရက်တွေသာ များခဲ့တာပါနော်။

ဪ.. ကျွန်မလိုပဲ မောင်ပြန်အလာကိုမျှော်တတ်တဲ့သူ နောက်ထပ်ရှိပါသေးတယ်။ ယက္ခလေ။ ယက္ခဆိုတာ မောင်မွေးထားတဲ့ မောင့်အချစ်တော်အင်းခွေးကြီးပေါ့၊ ယက္ခကြီးကတော့ မောင်ပြန်လာတိုင်း ကိုယ်ပေါ်ထိအောင်ဖက်တက်နေကျ။ မောင် ပြန်မလာတဲ့ညများဆိုရင် ကုတင်အောက်မှာတအီအီနဲ့ ငြီးလို့မ ဆုံးနိုင်တော့ဘူး၊ ဟိုပြေး’Dပြေးနဲ့လည်း ယောက်ယက်ခတ်နေ သေးတယ်။ ဪ.. ခွေးကမှ သူ့ဝေဒနာကိုဖွင့်အံနိုင်သေးတယ်၊ ကျွန်မမှာကြိတ်ခံနေရတာ။

အခုလည်း ယက္ခကြီး မောင်နဲ့မတွေ့ရတာကြာလို့ မနေနိုင်တော့ဘူး၊ တစ်အိမ်လုံးအနှံ့အပြားပြေးလွှားလို့။ မောင့်ဖိနပ် တွေကိုကိုက်ဆွဲ၊ မောင့်အဝတ်ဘီရိုကိုပတ်ပြေး၊ မောင့်ဓာတ်ပုံကို ကြည့်ဟောင်၊ မောင့်အငွေ့အသက်ရှိရာတွေနားမှာ ပြေးလွှားရင်း ယောက်ယက်ခတ်နေရှာတယ်။

ကျွန်မကရော၊ ရင်တစ်ခုလုံးပေါက်ကွဲလုမတတ် သောက မီးတွေအုံကြွနေရပါပြီ။ ဒါပေမယ့် ဒီတစ်ခါဖြစ်ရတဲ့ရင်အပူဟာ မောင်ပြန်မလာလို့ပူပန်ရတဲ့သောကတစ်မျိုးထဲမဟုတ်ပါဘူး။ စိမ်းကားရက်စက်တဲ့မောင့်အပေါ်ဖြစ်ရတဲ ဒေါသ၊ ကျွန်မရဲ့မာနကို ဥပေက္ခာပြုခံရတဲ့ အတွက်ဖြစ်ရတဲ့မောဟ။

ဟုတ်တယ်လေ။ တစ်ရက်၊နှစ်ရက်၊သုံးရက်အထိ မောင် ပြန်မလာပဲရှိတတ်တာ ရိုးနေပြီမို့ စိတ်မပူမိသေးဘူး။ သုံးရက်က လွန်လို့ ငါးရက်၊ခြောက်ရက်၊တစ်ပတ်။ အို.. ကျွန်မမနေနိုင်တော့ဘူး။ တစ်ပတ်ကလွန်လို့ နှစ်ပတ်၊ ကျွန်မရူးတော့မယ်မောင်။

နှစ်ပတ်စွန်းလို့ သုံးပတ်ထဲအဝင်မှာတော့ ကျွန်မအိမ်မှာ ထိုင်မနေနိုင်တော့ပါဘူး။ မောင်ကျင်လည်နေတဲ့လောကတွေထဲ ကို ကျွန်မ မကျွမ်းဝင်ပါပဲနဲ့လိုက်ရပြီ။ ရွှေဘုံသာ၊ ပန်းဆိုးတန်း၊ ဗိုလ်အောင်ကျော်လမ်း၊ ဗိုလ်ချုပ်ဈေး၊ ပွဲစားတွေ၊ ဈေးသည်တွေ၊ သင်္ဘောသားတွေရဲ့ကြား၊အကြည့်စိမ်းစိမ်းတွေကြားမှာ အနေကြုံ့စွာ၊ ရိသဲ့သဲ့အပြောတွေကြားမှာ မျက်နှာငယ်စွာ။

ဪ... ကိုလင်းဆွေအမျိုးသမီးလား။ သူပြန်မလာလဲ မပူပါနဲ့ဗျာ-ဟဲ-ဟဲ၊ အင်းပေါ့.. ကြာပြီဆိုတော့လည်း၊ အဲ..စိတ် ပူမှာပေါ့။ ‘Dလူက တော်တော်စွံတဲ့လူဗျ၊ အားကျစရာဗျာ၊ ကြည့် စမ်း- ကိုယ့်မှာ ‘gလောက်ချစ်စရာကောင်းတဲ့မိန်းမလှလှလေးရှိ နေတာများ.......

] သူနောက်ဆုံးတွဲနေတဲ့ကောင်မလေးက တော်တော်ငယ်တယ်၊ သူလည်း တော်တော်စွဲလမ်းပုံပဲ၊ သူတို့ခရီးထွက်မယ်ဆို တာတော့ကြားတယ်ဗျ၊ ဘယ်ကိုရယ်တော့မသိဘူး }

အဲဒီ မရေမရာသတင်းစကားလေးပဲ ရခဲ့တယ်။

ညတွေဟာ ကျွန်မရဲ့သက်ပြင်းချသံ၊ ယက္ခရဲ့ တအီအီ ညီးညူသံတွေနဲ့ ရှည်လျားခဲ့ရပြီ။ မောင်ကျွန်မကိုပစ်သွားပြီလား၊ ပြန်မလာတော့ဘူးလား၊ မောင်တစ်ခါမှ ဒီလောက်မကြာဘူးပါဘူး ကျွန်မတစ်ယောက်ထဲကိုပဲတကယ်ချစ်တာပါဆို။ အခုမိန်းကလေးကို တစ်လလောက်ကြာတဲ့အထိတွဲနေတာ ဘာကြောင့်လဲ၊ အမလေး- ကျွန်မမတွေးရဲဘူး။ ကျွန်မကို အိမ်ကြီးတစ်လုံး၊ ခွေးတစ်ကောင်နဲ့ပစ်ထားခဲ့ပြီလားမောင်။

နောက်ဆုံး. မောင့်မှတ်စုစာအုပ်ထဲမှာပါတဲ့ တယ်လီဖုန်း နံပါတ်ကုန်စင်အောင် လှည့်ပြီးစုံစမ်းတော့မှ..

] ဟုတ်တယ်၊ ပြီးခဲ့တဲ့အပတ်က မန္တလေးမှာတွေ့ခဲ့ တယ်၊ သူတို့ ပြင်ဦးလွင်တက်ကြဦးမယ်ပြောတယ်၊ အခုဆိုရင် ပြင်ဦးလွင်က ဟိုတယ်တစ်ခုခုမှာရှိနေကြလိမ့်မယ် }

ကျွန်မရူးပြီ။ ကျွန်မရူးသွားပြီ။

ကျွန်မ ဘာကိုမှ အာရုံထားလို့မရတော့ဘူး။ စားချင် သောက်ချင်စိတ်လည်း မရှိတော့ဘူး။ အိပ်ချင်နားချင်စိတ်လည်း မရှိတော့ဘူး။ ကျွန်မဦးနှောက်တွေထုံထိုင်းလာတယ်။ ကျွန်မရင် နဲ့အပြည့်ဖြစ်နေတာက အမုန်း။ ဟုတ်တယ်၊ မောင့်ကိုမုန်းတဲ့ အမုန်း။ ကျွန်မအချစ်ကို တစ်နေ့တခြားစော်ကားလာတဲ့မောင့်အ ပေါ်မှာ နာကျည်းတဲ့အမုန်း။ မုန်းတယ်၊ ကျွန်မသူ့ကို မုန်းသွားပြီ

မုန်းတယ်။

အို- သွားစမ်းပါ ဒီခွေးကလဲ၊

ယက္ခက တအင်အင်အော်ညီးရင်း ကျွန်မခြေဖမိုးကိုလာ နမ်းတယ်။ ဟုတ်သားပဲ၊ ကျွန်မသူ့ကို ဘာမှမကျွေးရသေးဘူး။ မစားနဲ့၊ ငါလဲမစားဘူး၊ နင်လဲမစားနဲ့။ နင့်ကိုလဲ အရေးအရာလုပ် ပြီးကျွေးမနေနိုင်ဘူး။ သွားစမ်းပါ၊ နောက်တစ်ခါလာနမ်းတဲ့ယက္ခ ကို ကန်ထုတ်ပစ်လိုက်တယ်။

ကျွန်မဟာ ယက္ခကိုကြည့်ရင်းကြည့်ရင်း အမုန်းစိတ် တွေဝင်လာတယ်၊ သူဟာ မောင့်ရဲ့ခွေး၊ သူ့သခင်ဟာ ကျွန်မကို သောကတွေပေးနေတဲ့လူ။ သူ့ကိုလည်း မုန်းတယ်။

ယက္ခနောက်တစ်ခါ ကျွန်မလက်ဖမိုးကိုလာနမ်းတဲ့အခါ မှာတော့ ကျွန်မလည်းစိတ်ဆိုးမာန်ဆိုးနဲ့ အနားမှာရှိတဲ့ဖုံသုတ် ကြက်မွှေးကိုယူပြီး ရိုက်ပစ်လိုက်တယ်။ ယက္ခဟာအံ့ဩပြီး နောက်တစ်ချက်ဆုတ်သွားတယ်။ မယုံနိုင်သလိုကြည့်နေပြီးမှ ရှေ့ကိုထပ်တိုးလာပြန်တယ်။ ကျွန်မထပ်ပြီးရိုက်လိုက်တယ်။ နောက်တစ်ချက်၊ နောက်တစ်ချက်၊ နောက်တစ်ချက်၊ ထပ်ကာ.. ထပ်ကာရိုက်ပစ်လိုက်ပါတယ်။ မောင့်အပေါ်မှာရှိနေတဲ့a’gသ တွေအားလုံးကို ယက္ခဆီစုပုံပြီးဖောက်ခွဲပစ်လိုက်တာပါပဲ။

ကျွန်မဟာ ယက္ခကို ဆက်ကာ၊ ဆက်ကာရိုက်ပစ်လိုက် တယ်။ ရိုက်ရင်း.. ရိုက်ရင်း ယက္ခကိုမောင်လို့ထင်လာတယ်။ ‘g ဟာ မောင့်ကိုလက်စားချေနေတာပဲ။ ဟုတ်တယ်။ အရိုက်ခံရလွန်း တော့ ယက္ခဟာ အခန်းကိုပတ်ပြေးတယ်။ ပြေးရင်း အခန်းa’gင့် ကိုရောက်သွားတယ်။ ကျွန်မကလည်း အလျှော့မပေးဘူး။ ဆက် ရိုက်တာပဲ။ အ္လဲါ နင့်သခင်အတွက်ဟဲ့။ နင့်သခင်အတွက်။ နင့် သခင်မကောင်းသမျှ နင်ခံ။

ကျွန်မဟာ နဂိုကတည်းက တိရိစ္ဆာန်တွေကိုချစ်တတ်တဲ့ သူမဟုတ်ပါဘူး။ ယက္ခကိုလည်း အမြဲဘာသိဘာသာနေခဲ့တာ။ ခု လို ဒေါသတွေပေါက်ကွဲနေတဲ့အခါကျတော့ မညှာတာမိတော့ဘူး။ ယက္ခအခန်းa’gင့်မှာချောင်ပိတ်မိနေပြီ။ ကျွန်မကလည်း ဆက်ရိုက်တာပဲ။ ယက္ခပြေးပေါက်မရှိတော့ဘူး။ နောက်ဆုံးတော့ ယက္ခဟာ ကျွန်မကို သွားဖြီးပြီးပြန်ဟောင်ပါတော့တယ်။

နောက်တစ်ချက်အရိုက်လိုက်မှာတော့ ကြိမ်ကြက်မွှေးကို ကိုင်ထားတဲ့ ကျွန်မလက်ကိုခုန်ဟပ်လိုက်တယ်။ အမလေး။ ကျွန် မအတော်နာသွားတယ်။ ဖုံသုတ်ကြက်မွှေးလည်း ကျွတ်ကျသွားတယ်။ ယက္ခလည်း ထွက်ပြေးသွားပါတော့တယ်။

ကျွန်မရဲ့ညာဖက်လက်ဖမိုးဟာတော့ ယက္ခကိုက်လိုက် တဲ့အတွက် ပေါက်ပြဲသွားပြီး သွေးတွေစီးကျလာပါတော့တယ်။

အဲဒီညမှာပဲ မောင်ပြန်လာခဲ့တယ်လေ။

ဩော- မောင်။ အပြစ်မဲ့တဲ့ကျွန်မကပဲတောင်းပန်ရဦး မယ့်ပုံပါလား။ အိမ်နဲ့တစ်လကျော်ကင်းကွားနေတဲ့လူ အိမ်ပြန် ရောက်လာပုံကလဲ၊ မနက်ကမှ အိမ်ကထွက်သွားပြီးပြန်လာပုံမျိုး။ ခပ်တည်တည်ပဲ၊ ပြန်လာတော့လည်း ညသန်းကောင်၊ အရက်တွေလည်းမူးလို့။ ရောက်ရောက်ချင်း အိပ်ရာထဲဝင်ပြီး အ ဆန့်သားအိပ်တော့တယ်။ ဘယ်လိုလဲမောင်။

အိပ်နေတဲ့မောင့်ကိုကြည့်ရင်း ကျွန်မအမုန်းတရားတွေ ဟာ တစ်စတစ်စကြီးထွားလာတော့တယ်။ မောင်က ကျွန်မကို အရုပ်တစ်ရုပ်လိုသဘောထားတာပဲ၊ ကျွန်မမှာ ခံစားချက်ရှိတယ် မောင်။ ရှင်ထားသလို ကျွန်မမနေနိုင်ဘူး။ ကျွန်မ ရှင့်ကို ဘယ် နှခါခွင့်လွှတ်နေရဦးမှာလဲ၊ ကျွန်မအသက်ရှင်နေသမျှ၊ ရှင်အသက် ရှင်နေသမျှ ရှင်မယားငယ်ထားတာတွေကို ကျွန်မထိုင်ကြည့်နေရ မှာလား။ ကျွန်မသည်းမခံနိုင်တော့ဘူးရှင်။ ရှင်အသက်ရှင်နေသမျှတော့ ရှင်ကလည်း ရှင့်ဗီဇကိုဖျောက်မှာမဟုတ်ဖူး။ ကျွန်မ ရှင့်ကို တခြားမိန်းမတွေနဲ့ ခွဲဝေပြီးပိုင်ဆိုင်မနေနိုင်တော့ဘူး၊ ရှင် ဟာ ကျွန်မတစ်ယောက်ထဲပိုင်ဖြစ်ရမယ်။ အဲဒီလိုဖြစ်ဖို့လည်း နည်းလမ်းတစ်ခုပဲရှိတယ်လေ။

ကျွန်မရူးသွားပါပြီ။ သိနေတယ်၊ ကိုယ့်ကိုကိုယ်ရူးသွား မှန်းလဲသိနေတယ်။ ကျွန်မ အချစ်ကြောင့်ရူးရတာပါရှင်..

ကျွန်မ တူတစ်လက်ကိုယူလိုက်တယ်၊ ပြီးတော့.. အိပ် ပျော်နေတဲ့သူ့ခေါင်းကို တူနဲ့ အဆက်မပြတ် ထု-ထု-ထု-ထု-

သူသေသွားတဲ့အချိန်မှာတော့ အံ့ဩစရာကောင်းစွာပဲ သူ့အပေါ်မှာထားတဲ့အမုန်းတရားတွေဟာ လွင့်ပျောက်ပျက်ပျယ် သွားပါတော့တယ်။ အရင်ကအတိုင်း သူ့ကိုအလွန်အမင်းချစ် မြတ်နိုးတဲ့စိတ်တွေပြန်ပေါ်လာတယ်။

ကျွန်မကြေနပ်သွားပြီ။ သူ ဘယ်မိန်းမနဲ့မှမရှုပ်နိုင်တော့ဘူးလေ၊ သူဟာ ကျွန်မတစ်ယောက်ထဲပိုင်ဖြစ်သွားပြီ။ ကျွန်မ ပျောက်လိုက်တာလေ။

ဒါပေမယ့်.. ဒါပေမယ့်မောင်ရယ်.. ဘယ်အညှိုးတွေနဲ့ များ ကျွန်မကိုမောင့်ဝိညာဉ်ကလာချောက်နေရတာလဲ၊ မောင့်ကို သတ်ပစ်ခဲ့လို့ မောင်မကြေနပ်ဖူးလားဟင်၊ ..ဒါဆိုလည်း ကျွန်မ အပေါ်မှာ မောင်ဆိုးခဲ့တဲ့အဖြစ်တွေနဲ့ သင်ပုန်းချေလိုက်ပါမောင် ရယ်...

မောင်လည်း အသက်ပြန်ရှင်မလာနိုင်တော့တဲ့အတူတူ ကျွန်မကိုချောက်လှန့်မနေပါနဲ့တော့။ ကျွန်မတောင်းပန်ပါတယ်၊ သွားပါတော့၊ သွားပါတော့မောင်ရယ်...

ကျွန်မကိုမချောက်ပါနဲ့၊ ကျွန်မကြောက်တယ်၊ အမလေး

+ + + + +

ကျွန်မကြောက်တဲ့ညကိုရောက်လာပြန်ပြီ။

ဟော- လူခေါ်ခေါင်းလောင်းသံ၊

အိမ်ရှေ့တခါးမကြီးဆီလှမ်းကြည့်လိုက်တော့ လူခေါ်ဘဲလ်နှိပ်နေတဲ့လူတစ်ယောက်ကိုတွေ့ရတယ်။ ဘုရားရေ- အဲဒါ.. မောင်ပါလား။ ဟုတ်တယ်၊ ညမှုန်ရီဝိုးတဝါးအောက်မှာမြင်နေရတာ မောင်မှ မောင်အစစ်။ မောင်ကျွန်မကိုမြင်သွားပြီလားမသိ။ ကျွန်မ နံရံအကွယ်ကိုကပ်နေလိုက်မိတယ်။ အို.. ဒါပေမယ့် သူဟာနာနာဘာဝပဲ၊ အချိန်မရွေး အိမ်ထဲကိုဝင်လာနိုင်တယ်။

ကျွန်မ ဇောချွေးတွေပြန်လာပြီ၊ သွားပါတော့မောင်ရယ်။

ဘဲလ်သံက အဆက်မပြတ်မြည်နေဆဲ၊ ကျွန်မမဝံ့မရဲ ချောင်းကြ်ာ့လိုက်တယ်၊ မောင်ဟာ မြင့်မားတဲ့သံတခါးကြီးနဲ့ မှန်ကွဲတွေထိုးစိုက်ထားတဲ့အုတ်နံရံကြီးကို မော့်ကြည့်နေတယ်။

ဟော- ခေါင်းလောင်းသံရပ်သွားပြီ။ နောက်တစ်ခါ ချောင်းကြည့်လိုက်တော့ .. ဟင်-မောင်မရှိတော့ဘူး။ ဒါဆို မောင် အိမ်ထဲဝင်လာပြီးချောက်ဦးမှာလား။

အတွေးမဆုံးခင်မှာပဲ တယ်လီဖုန်းသံမြည်လာပြန်တယ်၊ ကောက်ကိုင်လိုက်တော့-

] အေး- ဘာဖြစ်လို့မောင့်ကိုတခါးဖွင့်မပေးတာလဲ ကွယ်၊ အေးမောင့်ကိုစိတ်ဆိုးနေပြီလားဟင် }

] အား... }

တယ်လီဖုန်းကိုပစ်ချလိုက်ပြီး စူးစူးဝါးဝါးအော်ပစ်လိုက် မိတော့တယ်။ ကျွန်မဘယ်လိုမှမနေနိုင်တော့ဘူး။ ကျွန်မဆောက် တည်ရာမရအောင်ကြောက်လန့်နေရပြီ။

ကယ်တော်မူကြပါဦးရှင်၊

ဘယ်ဆီမှန်းမသိ၊ တမ်းတတိုင်တည်လိုက်မိတော့တယ်၊

+ + + + +

] အေး }

ဈေးအလည်ခေါင်တည့်တည့်မှာ ကျွန်မလက်ကို လှမ်း အဆွဲခံလိုက်ရပါတယ်။ ဆွဲတဲ့သူကိုကြည့်လိုက်တော့..

] အမလေး }

ကျွန်မအလန့်တကြားအော်လိုက်မိတယ်။

ကျွန်မလက်ကိုလှမ်းဆွဲလိုက်သူဟာ မောင်ပါပဲ၊

ကျွန်မအော်သံကြောင့် လူတွေကျွန်မကိုဝိုင်းကြည့်လာကြတယ်။ သိပ်လန့်သွားလို့ ကျွန်မလက်ထဲကဆွဲခြင်းဟာ မြေ ကြီးပေါ်လွတ်ကျသွားပါပြီ။

] အေးကလဲကွာ၊ မောင့်ကိုမြင်တာများ သရဲမြင်တာကျ နေတာပဲ }

သူကပြောရင်း ဆွဲခြင်းနဲ့ပစ္စည်းတွေကို ပြန်ကောက်ထည့် နေပါတယ်။ ဒီတော့မှ ကျွန်မတို့ကိုဝိုင်းကြည့်နေတဲ့လူတွေလည်း မျက်နှာလွှဲသွားကြတော့တယ်။

ကျွန်မကတော့ ကြက်သေသေနေဆဲ။

] လာလေအေး၊ သွားကြစို့ }

သူက ကျွန်မလက်ကိုပိုင်စိုးပိုင်နင်းဆွဲပြီး ဈေးထဲကခေါ် ထုတ်လာခဲ့တော့တယ်။

သူဟာဘယ်သူလဲ၊ မောင်နဲ့ ဘာကြောင့် ဒါလောက်တူ နေရတာလဲ၊ ကျွန်မခေါင်းပူအောင်စဉ်းစားရပြီ။

သူဟာ ကျွန်မကို လက်ဖက်ရည်ဆိုင်တစ်ဆိုင်ထဲအထိ ခေါ်သွားတယ်။ သူ့အတွက်လက်ဖက်ရည်နဲ့ကျွန်မအတွက်ကော်ဖီ တစ်ခွက်မှာလိုက်တယ်။ ကြည့်စမ်း၊ ကျွန်မ လက်ဖက်ရည် မ သောက်တတ်မှန်းသူသိနေတယ်။ သူဘယ်သူလဲ၊ သူ့ရုပ်က မောင် နဲ့ချွတ်စွပ်၊ သူ့အသံက မောင့်အသံနဲ့တစ်ထေရာထဲ၊ ဒါပေမယ့် သူဟာ သရဲတော့လည်းမဟုတ်နိုင်ဘူး။ ကျွန်မတစ်ယောက်ထဲကို ချောက်နေတဲ့သရဲဆိုရင် တခြားလူတွေ ဘယ်မြင်ရမှာလဲ၊ အခု တော့ ဈေးထဲမှာရော လက်ဖက်ရည်ဆိုင်မှာပါ သူ့ကိုလူတွေမြင် နေရမှန်းသိသာတယ်။ စားပွဲထိုးကိုတောင် သူကိုယ်တိုင် လက်ဖက် ရည်မှာသေးတာပဲ၊ သူဘယ်သူလဲ၊ ကျွန်မကြောက်စိတ်တွေပျောက်သွားတယ်။

သူဟာ ကျွန်မကိုဘယ်လောက်လွမ်းကြောင်း တဖွဲ့တနွဲ့ ပြောပြနေလေရဲ့။ မမျှော်လင့်ပဲ ခရီးလွန်သွားလို့ ကြာသွားရတာ ပါတဲ့၊၊ နေစမ်းပါဦး၊ သူက ဘာလို့ မောင့်အယောင်ဆောင်နေရတာလဲ။ မောင်က သေသွားပြီပဲ။

ကျွန်မ ခေါင်းအေးအေးထားပြီး စဉ်းစားရပါတော့တယ်။ ဟုတ်ပြီ၊ ကျွန်မသိပြီ။ မောင် ရုတ်တရက်ပျောက်သွားရတာကို မောင့်အသိုင်းအဝိုင်းက သိမယ်၊ အဲဒီအတွက် ကျွန်မကိုသံသယ ဝင်နေကြလိမ့်မယ်။ ကျွန်မသတ်ပစ်လိုက်တယ်လို့ ထင်ကောင်း ထင်နေကြလိမ့်မယ်၊ ဒါပေမယ့် သူတို့မှာ သက်သေမရှိဘူးလေ။ အဲဒီတော့ စုံစမ်းဖို့ ဟောဒီလူကိုလွှတ်လိုက်တာနေမှာပေါ့၊

ကျွန်မမောင့်ကိုသတ်ပစ်လိုက်တာမှန်ရင် ]ဟောဒီလူ} ကို မောင်အဖြစ် ကျွန်မလက်ခံမှာမဟုတ်ဖူးလို့ သူတို့တွေးကြလိမ့်မယ်။ ]ဟောဒီလူ}ကလည်း မောင့်အယောင်ဆောင်ပြီးကျွန်မ နောက်ကိုလုက်နေမှာပဲ။ ကျွန်မကို ထိကပါး၊ရိကပါးနဲ့ မခံချင်အောင်လုပ်နေမှာပဲ။ အဲဒီလိုနဲ့ မခံမရပ်နိုင်တဲ့တစ်နေ့မှာ ]ဟောဒီလူ} ဟာ မောင်မဟုတ်ကြောင်း၊ မောင်အစစ်ဟာ ကျွန်မ သတ်ပစ်လိုက်လို့ သေပြီဖြစ်ကြောင်း .. ကျွန်မဖွင့်ဟဝန်ခံလာတဲ့ အထိ သူတို့ကြံစည်ထားကြတာပဲ။

ဟာ-ဟ- ရယ်ချင်လိုက်တာရှင်။ ဒါဟာ ဟောင်းနွမ်းနေတဲ့ ခေတ်ဟောင်းလျှို့ဝှက်သည်းဖို ဇာတ်လမ်းထဲက ဇာတ်ကွက်တစ်ကွက်ပဲ။ ဒီနည်းရိုးကြီးနဲ့ ကျွန်မကိုလှည့်စားလို့ ရမတဲ့လား။ ဝေးသေးတယ်ရှင်၊ ကျွန်မက မိန်းမလည်ပဲ၊ ဘယ်ရလိမ့်မလဲ။

အဲ- မောင်နဲ့ ရုပ်ရောအသံပါချွတ်စွပ်တူတဲ့လူကို ရအောင်ရှာနိုင်တာတော့ ချီးကျူးပါရဲ့ရှင်။

] အိမ်ပြန်ကြစို့ }

ကျွန်မယုံချင်ယောင်ဆောင်လိုက်ပါတယ်။ နေနှင့်ဦးပေါ့လို့လဲ စိတ်ထဲကတေးထားလိုက်တယ်။ မိအေးအေးဟာ လူတစ် ယောက်ကိုသတ်ခဲ့တဲ့မိန်းမပါနော်။ သတ်ခဲ့တဲ့လူကလဲ ကိုယ့်လင်သား၊ ဘယ်ခေလိမ့်မလဲ။

မိအေးအေးအကြောင်း သိရစေမဟေ့။

+ + + + +

အတော်ပိရိတဲ့လူရှင်၊ ဟန်ဆောင်ကလဲ ကောင်းပါပေ့။

အိမ်ကိုရောက်တော့လည်း သူဝင်ထွက်သွားလာနေကျ အိမ်ကျနေတာပဲ။ ခပ်တည်တည်နဲ့။

] ဟင်-ယက္ခကြီးရော၊ အရင်ကဆို ဒီကောင်ကြီး မောင့်ကိုထွက်ကြိုနေကျ }

ကြည့်စမ်း၊ ကြည့်စမ်း၊ ကျွန်မသူ့ကိုသတိထားရမယ်။ သူက ယက္ခကိုတောင်သိနေတာပဲ။

] ယက္ခလား၊ ဘယ်ရောက်နေလဲမသိပါဘူး }

ဟုတ်ပါရဲ့။ သူပြောမှသတိရတော့တယ်။ ကျွန်မရိုက် လိုက်ပြီးကတည်းကယက္ခကြီးပျောက်နေလိုက်တာ၊ ထွက်ပြေးသွား ပြီထင်ပါရဲ့လေ။ ကျွန်မလည်း စဉ်းစားလို့မရတော့ဘူး။

] အေး ဟင်းချက်လိုက်ဦးမယ်နော် }

သူ့ကိုနှုတ်ဆက်ပြီး ကျွန်မ မီးဖိုဆောင်ထဲထွက်လာခဲ့တယ်။

ဘယ် ဟင်းချက်နိုင်မှာလဲ။ ဒီအယောင်ဆောင် လူလိမ်လူညာကိစ္စကို ဘယ်လိုဖြေရှင်းရမယ်ဆိုတာပဲ ကျွန်မခေါင်းပူအောင် စဉ်းစားနေမိတယ်။ လူလိမ်အဖြစ် ရဲစခန်းကိုတိုင်ရမလား။ ဝေးသေးတယ်။ အယောင်ဆောင်မှန်းဘယ်လိုသိလဲမေးရင် ကျွန်မ မောင့်ကိုသတ်ထားတာပေါ်သွားမှာပေါ့။ အဲဒီလောက်တော့ ကျွန်မ မအ-သေးဘူး။

ကျွန်မဟာ သူဘာလုပ်နေလဲသိရအောင် ချောင်းကြည့်လိုက်တယ်။ အမယ်- ကိုယ်တော်ချောက အိပ်ခန်းထဲမှာ၊ ကျွန်မ တို့ရဲ့နှစ်ယောက်အိပ်ကုတင်ပေါ် အဆန့်သားတက်အိပ်နေပါလား၊ ဒီပြသနာကို ကျွန်မအပြတ်ရှင်းမှဖြစ်တော့မယ်။

လွယ်လွယ်လေးပါ။ သူ့ကိုသတ်ပစ်လိုက်ရုံပေါ့၊ ကျွန်မ ပိုင်နက်ထဲရောက်နေပြီပဲဟာ။ လူတစ်ယောက်ကိုသတ်ခဲ့တဲ့အတွေ့အကြုံလည်း ကျွန်မမှာရှိနေပြီလေ။ သတ်ပြီးရင် သူ့ကို မောင်နဲ့အတူ ပိတောက်ပင်အောက်မှာမြှုပ်ထားရုံပဲ။ ကဲ-ဒါဆို နောက် ဘယ်သူက နှောက်ယှက်နိုင်ဦးမှာလဲ။

ကျွန်မဟာ မောင့်ကိုသတ်ခဲ့တဲ့တူကို ထုတ်ယူလိုက်တယ်။ တူမှာ မောင့်ရဲ့သွေးတွေ ချောက်ကပ်ပေကျံဆဲပါလား။ ဒီတူနဲ့ နောက်ထပ်လူတစ်ယောက်ကို သတ်ရပေဦးမယ်။

အယောင်ဆောင်လူလိမ်ကို ကျွန်မချောင်းကြည့်လိုက် တယ်။ သူမျက်စိမှိတ်ပြီး အိပ်နေပါတယ်။ ကျွန်မဟာ ခြေကိုဖွဖွ နင်း၊ လက်တစ်ဖက်က တူကိုကျစ်ကျစ်ပါအောင်ဆုပ်ပြီး သူ့အနား တဖြည်းဖြည်းကပ်လာခဲ့တယ်။

ကုတင်ဘေးရောက်တဲ့အခါ.. သူ့ခေါင်းဆီတည့်တည့် ချိန်၊ တူကိုလက်နှစ်ဖက်နဲ့ အားကုန်လွှဲမြှောက်လိုက်ပြီး ...

+ + + + +

စိတ်ထဲမှာ မသိုးမသန့်ရှိလာသည်မို့.. ကိုလင်းဆွေသည် ပိတ်ထားသောမျက်လုံးကိုဖွင့်ကြည့်လိုက်၏။

အေးအေးက သူ့ခေါင်းကိုတူနှင့်ချိန်ရွယ်ထုချလိုက်သည်ကို ရိပ်ကနဲမြင်လိုက်ရသည်။ ဖြတ်လတ်စွာရှောင်တိမ်းလိုက်သည်။

တူသည် ကုတင်ဘောင်ကို ‘dန်းကနဲထုမိပြီး သစ်သားဘောင်ပဲ့ကျသွား၏။

ကုတင်ပေါ်မှ လျင်မြန်စွာထပြီး အေးအေးတစ်ကိုယ်လုံး ကို သိမ်းကြုံးဖက်ထားလိုက်သည်။

] အေး-အေး- ဘာဖြစ်တာလဲ }

] လွှတ်-လွှတ်- ရှင် ကျွန်မကိုလွှတ် }

] အေး၊ သတိထားပါအေးရယ်၊ အေး ဘာဖြစ်သွားတာလဲ ဟင် }

] အို၊ ဖယ်ပါ၊ ရှင်ဟာ ကျွန်မယောက်ျားမဟုတ်ဖူး၊ ကျွန်မအသားကိုမထိနဲ့ }

အေးအေးကအတင်းရုန်းကန်ထွက်လိုက်ရာ နှစ်ယောက်စ လုံး ကြမ်းပြင်ပေါ်လဲကျသွား၏။

] အေး- အေး }

] ဖယ်၊ ရှင် မောင်မဟုတ်ဖူး၊ ရှင်လူလိမ်၊ ဖယ် }

] ဘာဖြစ်တာလဲအေးရယ်၊ မောင်ရှင်းပြ.. }

] အို- သွား၊ သွား၊ ကျွန်မယောက်ျားကသေပြီ၊ ကျွန်မ ယောက်ျားကို ကျွန်မကိုယ်တိုင်သတ်ပစ်လိုက်တာရှင့်၊ သိရဲ့လား၊ သူ့အလောင်းကို ပိတောက်ပင်အောက်မှာမြှုပ်ထားပြီးပြီ၊ ရှင်က လူလိမ် လူညာ၊ ရှင်ထွက်သွား }

စူးစူးဝါးဝါးအော်ဟစ်ရုန်းကန်ရင်း အေးအေးသတိလစ်သွားလေသည်။

+ + + + +

နောက်တစ်ပတ်တွင်.. အေးအေး၏စိတ်ဝ္လေနာကိုကုသ ရန် စိတ်ကျန်းမာရေးဆေးရုံသို့တင်လိုက်ရလေသည်။

လင်သားကိုအချစ်ကြီးသောမိန်းကလေး၊ အလိုဆန္ဒမပြည့်ဝသမျှ.. စိတ်ကူးယဉ်ကမ္ဘာလေးကိုတည်ဆောက်ရင်း စိတ်ဖြေသိမ့်ရာမှ စိတ္တဇဝေဒနာဖြစ်ခဲ့ရရှာလေသည်။

သူမ၏မှတ်တမ်းနှင့် ဒိုင်ယာရီက အေးအေး၏သနားဖွယ် စိတ်ဝေဒနာရှင်ဘ၀ကို ဖော်ပြနေလေ၏။

ကိုလင်းဆွေ ရှိုက်ကြီးတငင်ငိုမိရပြီ။ သူ၏မိုက်မှားမှုများကြောင့် ချစ်ဇနီးလေးစိတ်ရောဂါရခဲ့ခြင်းမဟုတ်ပါလား။

သို့သော်.. ကိုလင်းဆွေ၏နောင်တကား များစွာနောက်ကျခဲ့လေပြီ။

+ + + + +

အိမ်နောက်ဖေးပိတောက်ပင်ကြီးအောက်မှ မြေကြီးများကို တူးဖော်ကြည့်သည့်အခါတွင်ကား.. ပုပ်ပွနေသောခွေးတစ်ကောင်၏အလောင်းကိုတွေ့ရလေသည်။

+ + + + +

                                                                  ဆောင်းလုလင်