နွေတမာန်၏၀တ္ထုတို- အပြန်လမ်း

နွေတမာန်

အပြန်လမ်း

ဒီတစ်ခေါက် အိမ်ပြန်လာတော့

ကျွန်တော် အဖေ့ကို အရမ်းသတိရမိတယ်။

ကျွန်တော်အိမ်ပြန်ရောက်ရင် အဖေ့ကို  တွေ့ရတော့မှာ မဟုတ်ပါဘူး။

ကျွန်တော် ဒီနိုင်ငံကထွက်ခွာသွားတဲ့ လေးနှစ်အတွင်းမှာ

အဖေ သေဆုံးခဲ့ပါပြီ။

အိမ်မှာ အဖေမရှိတော့ဘူးဆိုတာ သိနေပေမယ့်

ကျွန်တော့်ရင်တွေဟာ ခုန်နေပါတယ်။

အဲဒီရင်ခုန်သံဟာ အဖေနဲ့ပြန်တွေ့ရတော့မယ့်အခါတိုင်း

ခံစားရတဲ့ ရင်ခုန်သံမျိုးပါ။

အဖေမရှိတော့ဘူးဆိုတာ သိနေပေမယ့်

ကျွန်တော်ဟာ အဖေနဲ့ ပြန်တွေ့လိုတွေ့ငြား  မျှော်လင့်နေမိတယ်။

အဖေ့ကိုတွေ့ချင်စိတ်တွေ တဖွားဖွားပေါ်နေမိတယ်။

ကျွန်တော့်ရင်တွေဟာ ခုန်နေပါတယ်။

x x x x x

ငယ်ငယ်က… ကျွန်တော်စကားပြောတတ်ခါစအချိန်မှာ

အိမ်မှာ အဖေရှိမနေဘူး။ ကျွန်တော် အသက်တစ်နှစ်ခွဲလောက်

ကတည်းက ရှေ့တန်းကိုထွက်ခွာသွားတဲ့အဖေဟာ

ကျွန်တော့်အသက် ၂နှစ်နဲ့၎လရှိချိန်ကျမှ

အိမ်ကိုပြန်ရောက်လာတယ်။

အဖေ ရှေ့တန်းကပြန်လာချိန်မှာ

ကျွန်တော် စကားစမ်းပြီး ပြောတတ်နေပြီတဲ့။

အဖေတို့ ရှေ့တန်းပြန်တပ်မတော်သားတွေဟာ

မြို့အ၀င်ကနေ တန်းစီပြီး ချီတက်လာကြတယ်။

မြို့သူမြို့သားတွေက ပန်းစည်းတွေ၊ ပန်းကုန်းတွေနဲ့

ရှေ့တန်းပြန်တပ်မတော်သားတွေကို ကြိုဆိုလို့ပေါ့။

အဲဒီလို ကြိုဆိုတဲ့အထဲမှာ ကျွန်တော်တို့မိသားစုလည်း ပါတယ်။

အဖေဟာ တပ်စိတ်တစ်စိတ်ရဲ့ရှေ့မှာ

သေနတ်ကိုပိုက်ပြီး ချီတက်လာတယ်။

အဲဒီအချိန်မှာ.. ကျွန်တော်ဟာ အမေ့ရင်ခွင်ထဲကနေ

အဖေ့ကိုလက်ညှိုးထိုးပြပြီး အော်ပြောလိုက်တယ်တဲ့။

`ဟိုမှာ… ကိုကိုမောင် … ကိုကိုမောင်…´

ကျွန်တော့်အပြောကြောင့် အားလုံးအံ့အားသင့်ခဲ့ရတယ်လို့ ဆိုပါတယ်။

အိမ်ပြန်ရောက်တော့လည်း….

`လာပါဦး သားရဲ့´လို့ ကျွန်တော့်ကိုလှမ်းခေါ်တဲ့အဖေ့ဆီကို

ကျွန်တော်က မသွားသေးပဲ၊

အဖေ့စာကြည့်ခန်းထဲ ပြေးဝင်သွားတယ်တဲ့။

စာကြည့်ခန်းထဲက ပြန်ထွက်လာတော့ ကျွန်တော့်လက်ထဲမှာ

အဖေသောက်နေကျ ဆေးတံ ပါလာတယ်တဲ့။

`ကိုကိုမောင်… ရော့..´

ကျွန်တော်က အဖေ့ကို ကိုကိုမောင်လို့ နာမည်ရင်းအတိုင်းခေါ်ပြီး

သူသောက်နေကျဆေးတံကြီးကို လှမ်းပေးလိုက်တော့

တစ်အိမ်သားလုံး အံ့အားသင့်နေကြတယ်တဲ့။

အဖေဟာ ကျွန်တော့်ကို တွေတွေကြီးကြည့်ပြီး

ဖက်ငိုပါရောတဲ့။

`အဖေ.. အဖေ.. ဒါ ကျုပ်အဖေ၊

ကျုပ်သားက ကျုပ်အဖေ ပြန်ဝင်စားတာပါလား´

အဲဒီကတည်းက… ကျွန်တော့်ကို ကျွန်တော့်အဘိုး(အဖေ့ရဲ့အဖေ)

ဝင်စားသူလို့ ဆွေးမျိုးတွေအားလုံးက မှတ်ယူခဲ့ကြတယ်။

ကျွန်တော့်အဖေနာမည်က `ကိုကိုမောင်´ဖြစ်ပေမယ့်…

အားလုံးက `မောင်မောင်´လို့ ခေါ်ကြတယ်ဆိုပဲ။

အဖေ့အမေ(ကျွန်တော့်အဘွား)ကလည်း သူ့သားကို

`မောင်မောင်´လို့ပဲ ခေါ်တယ်တဲ့။

ဆွေမျိုးတွေအားလုံးကလည်း `မောင်မောင်´ပဲ။

ငယ်တဲ့သူတွေကတော့ `ကိုမောင်မောင်´လို့ ခေါ်တယ်တဲ့။

ကျွန်တော့်အဘိုးတစ်ယောက်ပဲ

သူ့သားသူ အမွှန်းတင်ပြီး ``ကိုကိုမောင်´´လို့

နာမည်အပြည့်အစုံခေါ်တာတဲ့။

ကျွန်တော်ဟာ တစ်သက်လုံး အဖေ့ကို

`ကိုကိုမောင်´လို့ပဲ ခေါ်ခဲ့တယ်။

အဖေကလည်း အဲဒီလိုခေါ်တာကို သဘောကျလို့

အဲဒီအတိုင်းပဲ ခေါ်ခိုင်းခဲ့တာပါ။

ကျွန်တော်ဟာ အဘိုးရှိစဉ်က သုံးခဲ့တဲ့ပစ္စည်းတွေကိုလည်း

ခွဲခြားပြတတ်တယ်တဲ့။ အဘိုးရဲ့နောက်ကြောင်းတချို့ကိုလည်း

ပြန်ပြန်ပြောတတ်တယ်တဲ့။

x x x x x

ဒါတွေက လူကြီးတွေပြန်ပြောပြလို့ ကျွန်တော်သိခဲ့ရတဲ့

အကြောင်းတွေပါ။ ကျွန်တော် လူမှန်းသိတတ်စအရွယ်မှာတော့

အရင်ဘ၀က ကျွန်တော့်အကြောင်းတွေကို

ကျွန်တော်မမှတ်မိတော့ဘူး။

ပြန်စဉ်းစားလို့လည်း မရတော့ဘူး။

ဘာပဲဖြစ်ဖြစ်.. တစ်ဆွေလုံး တစ်မျိုးလုံးကတော့ ကျွန်တော့်ကို

သေသွားတဲ့ ကျွန်တော့်အဘိုး ဦးဘမြင့်ဝင်စားသူလို့

တစ်သက်လုံးပဲ မှတ်ယူထားခဲ့ကြတယ်။

အဲဒီအကြောင်းကြောင့်ပဲလား မသိဘူး။

အဖေနဲ့ကျွန်တော်ဟာ သာမန်သားအဖတွေထက်

ပိုပြီးရင်းနှီးခဲ့ကြတယ်။ နီးစပ်ခဲ့ကြတယ်။ ချစ်ခင်ခဲ့ကြတယ်။

အဖေ့အတွက်လည်း.. ကျွန်တော်ဟာ သူ့ဖခင်ဝင်စားသူဆိုတဲ့

အသိကြောင့်သာမက… သူ့အတွက် ကျွန်တော်ဟာ

တစ်ဦးတည်းသောသားဖြစ်နေလို့

အချစ်ပိုခဲ့တာ ဖြစ်နိုင်ပါတယ်။

အဖေက ကျွန်တော့်ကို သူ့လို တပ်မတော်သားဖြစ်စေချင်ခဲ့တယ်။

ဒါပေမယ့်.. ကျွန်တော်က အဖေဖြစ်စေချင်သလို မဖြစ်ခဲ့ဘူး။

ကျွန်တော်က လွတ်လပ်မှုကိုလိုလားတဲ့သူ၊

ကမ္ဘာအနှံ့ ခြေဆန့်ချင်တဲ့သူ။

ကျွန်တော့်လမ်းကြောင်း ကျွန်တော်ရွေးပြီး

ကျွန်တော်ဟာ နိုင်ငံခြားသင်္ဘောသားဖြစ်ခဲ့ပါတယ်။

x x x x x

ကျွန်တော် သင်္ဘောက လေးခေါက်ပြန်ဆင်းလာပြီးတဲ့အချိန်မှာ

အဖေ ပင်စင်ယူတယ်။ အမေလည်း ဆုံးသွားပြီ။

အဖေဟာ တစ်ဦးတည်းသောသား ကျွန်တော့်အိမ်ကို

ရောက်လာခဲ့တယ်။ ကျွန်တော်က ပင်လယ်ထဲက သင်္ဘောတစ်စင်း

ပေါ်မှာ တာဝန်ထမ်းဆောင်နေတဲ့အချိန်မှာ… အဖေက

ကျွန်တော့်မိသားစုကို စောင့်ရှောက်ပေးနေခဲ့ပါတယ်။

ပင်စင်စားတပ်မတော်အရာရှိကြီးအဖေဟာ သူ့ချွေးမ၊

မြေးများနဲ့အတူ သူ့ဘ၀နောက်ဆုံးအချိန်များကို

ပျော်ပျော်ပဲ ဖြုန်းပစ်ခဲ့ပါတယ်။

အဖေဟာ ကျွန်တော့်ဆီကို စာရှည်ကြီးတွေလည်း

မပြတ်တမ်းရေးတယ်။ ကမ်းမမြင်လမ်းမမြင် ပင်လယ်ပြင်ထဲမှာ

အဖေ့စာကိုဖတ်ရတာဟာ

ကျွန်တော့်အတွက် အားတစ်ခုပါပဲ။

နောက်ဆုံးအခေါက် သင်္ဘောပေါ်ကဆင်းတော့

အဖေက ကျွန်တော့ကိုပြောတယ်။

`ငါ့သား.. ဒီတစ်ခေါက်လိုက်ပြီးရင် မင်းသင်္ဘောပေါ်

မတက်နဲ့တော့ကွာ၊ မင်းအသက်လည်း မငယ်တော့ဘူး၊

ရှာသင့်သလောက်လည်း ရှာပြီးပြီပဲ၊

အိုးမကွာ အိမ်မကွာ စီးပွားရေးလေးပဲ လုပ်တော့ကွာ´

ကျွန်တော်ကလည်း သင်္ဘောသားဘ၀ကို အနားယူတော့ဖို့

ဆုံးဖြတ်လိုက်ပါတယ်။

ဟုတ်တယ်။ ကျွန်တော့်အသက်ဟာ ငါးဆယ်နီးနေပြီ။

အဖေ့အသက်လည်း ရှစ်ဆယ်နား ကပ်နေပြီ။

ကျွန်တော်နားသင့်ပြီ။

ကျွန်တော်နားသင့်ပြီဆိုတာက အဖေမသေခင်

အဖေနဲ့အတူတူနေနိုင်ဖို့ ရည်ရွယ်ချက်နဲ့ပါ။

ဒီအခေါက်ဟာ.. ကျွန်တော်ရဲ့

ပင်လယ်ကူးသင်္ဘောသားဘ၀ နောက်ဆုံးအခေါက်ပါပဲ။

နောက်ဆုံးအခေါက် သင်္ဘောပေါ်မတက်ခင်မှာ

ကျွန်တော့်သားအကြီးကို အိမ်ထောင်ချပေးခဲ့တယ်။

x x x x x

ဒါပေမယ့်.. သင်္ဘောနားတဲ့အချိန်မှာ

အဖေနဲ့အတူတူနေမယ်ဆိုတဲ့ ကျွန်တော့်ရဲ့ရည်ရွယ်ချက်ဟာ

မပြည့်မြောက်ခဲ့ပါဘူး။ ကျွန်တော်သင်္ဘောပေါ်ရောက်ပြီး

တစ်နှစ်ကြာချိန်မှာပဲ.. အဖေကွယ်လွန်သွားပြီလို့

သတင်းကြားရတယ်။ ကျွန်တော်ဟာ အဝေးကနေ

ကြေကွဲရုံကအပ.. မြန်မာပြည်ကို ပြန်မလာနိုင်ခဲ့ပါဘူး။

အဖေ့အတွက် အဝေးကနေပဲ မျက်ရည်ဝေခဲ့ရတယ်။

အဲဒီအချိန်ကစလို့… ကျွန်တော်တမ်းတမျှော်လင့်နေတဲ့

အဖေ့စာတွေကိုလည်း မဖတ်ရတော့တာပါ။

ပွင့်ပွင့်လင်းလင်းဝန်ခံရရင်.. အိမ်က ဇနီးနဲ့သားသမီးတွေ

ရေးတဲ့စာတွေဟာ အဖေ့စာတွေလောက်

ကျွန်တော့်ရင်ကို ကြေနပ်မှုမပေးနိုင်တာ အမှန်ပါပဲ။

အိမ်ကတော့.. ကျွန်တော့်ဆီကို စာတွေသာမက..

အမှတ်တရဓာတ်ပုံတွေကိုပါ

ပင်လယ်ခြားက ကျွန်တော့်ဆီအရောက် ပို့ပေးနေပါတယ်။

သားကြီးကမွေးတဲ့ ကလေးရဲ့ဓာတ်ပုံတွေကိုလည်း

လသားအရွယ်ကစပြီး ကျွန်တော့်ဆီ ပို့ပေးခဲ့တယ်။

ကျွန်တော်ပင်လယ်ထဲရောက်ပြီး ၂နှစ်ကြာချိန်မှာမွေးခဲ့တဲ့

ကျွန်တော့်မြေးလေးကို ကျွန်တော်ဟာ

ဓာတ်ပုံပဲ မြင်ရပါသေးတယ်။

အခုလို.. ကျွန်တော်အပြီးပြန်လာချိန်မှာ

အဖေရှိမနေတော့ပါလား။ အဖေ့အစား မျိုးဆက်သစ်

မြေးလေးကိုတော့ ကျွန်တော်တွေ့ရတော့မှာပေါ့။

မြေးကလေးတောင် အသက်နှစ်နှစ်ရှိနေပြီလေ။

စကားတွေ တီတီတာတာ ပြောတတ်နေပြီတဲ့။

နောက်ဆုံးရတဲ့စာထဲမှာ ကျွန်တော်ဖတ်ခဲ့ရပါတယ်။

x x x x x

မြန်မာပြည်ပြန်ရောက်တာနဲ့

ရန်ကုန်မှာလုပ်စရာရှိတဲ့ကိစ္စလေးတွေ အမြန်ဖြတ်ပြီး

ကျွန်တော့်ဇာတိမြို့ကိုပြန်လာခဲ့တယ်။

ဒီတစ်ခေါက်အိမ်ပြန်လာတော့ ကျွန်တော် အဖေ့ကို

အရမ်းသတိရမိတယ်။ ကျွန်တော်အိမ်ပြန်ရောက်ရင်

အဖေ့ကိုတွေ့ရတော့မှာ မဟုတ်ပါဘူး။

အိမ်မှာ အဖေမရှိတော့ဘူးဆိုတာ သိနေပေမယ့်

ကျွန်တော့်ရင်တွေဟာ ခုန်နေပါတယ်။

အဲဒီရင်ခုန်သံဟာ အဖေနဲ့ပြန်တွေ့ရတော့မယ့်အခါတိုင်း

ခံစားရတဲ့ ရင်ခုန်သံမျိုးပါ။

အဖေမရှိတော့ဘူးဆိုတာ သိနေပေမယ့်

ကျွန်တော်ဟာ အဖေနဲ့ ပြန်တွေ့လိုတွေ့ငြား  မျှော်လင့်နေမိတယ်။

အဖေ့ကိုတွေ့ချင်စိတ်တွေ တဖွားဖွားပေါ်နေမိတယ်။

ကျွန်တော့်ရင်တွေဟာ ခုန်နေပါတယ်။

x x x x x

မီးရထားက ကျွန်တော်တို့မြို့ဘူတာရုံကို ဆိုက်လိုက်ပါပြီ။

ကျွန်တော့်ကိုလာကြိုနေတဲ့မိသားစုကို အစုလိုက်ကြီး

ရထားပေါ်က လှမ်းမြင်လိုက်တယ်။

ကျွန်တော့်ချွေးမလေးရင်ခွင်ထဲက မြေးကလေးကိုလည်း

အဝေးကနေ လှမ်းမြင်လိုက်ရပါတယ်။

ရထားပေါ်က ဆင်းလာတော့ ကျွန်တော့်ရင်တွေဟာ ခုန်နေပါတယ်။

ကျွန်တော့်မိသားစုက ကျွန်တော်ရှိရာကို အပြေးတစ်ပိုင်း

လျှောက်လာတယ်။ ကျွန်တော်ကလည်း သူတို့ရှိရာကို

လျှောက်လာခဲ့တယ်။

ကျွန်တော့်ရင်တွေဟာ ခုန်နေပါတယ်။

ကျွန်တော်ဟာ မျှော်လင့်ချက်တစ်ခုနဲ့ ရင်တွေခုန်နေတယ်။

စကားတတ်ခါစ ကျွန်တော့်မြေးလေးက…

ကျွန်တော့်ကို ….

`ဟေ့.. အောင်အောင်၊ ဟိုမှာ.. အောင်အောင်ရယ်´

လို့များ… ပြောလိုက်လေမလားဆိုတဲ့ မျှော်လင့်ချက်နဲ့

ကျွန်တော့်ရင်တွေ ခုန်နေရတာပါ။

အဖေကိုယ်တိုင်မှည့်ပေးခဲ့တဲ့

ကျွန်တော့်နာမည်ရင်းက `အောင်နိုင်´ပါ။

အဖေက ကျွန်တော့်ကို….

``အောင်အောင်´´ လို့ပဲ…

တစ်သက်လုံးခေါ်ခဲ့ပါတယ်။

x x x x x

               နွေတမာန်

ဂမ္ဘီရလောကမဂ္ဂဇင်းမှ….