ဆောင်းလုလင်၏၀တ္ထုတို- မသာရထား

ဆောင်းလုလင်

မသာရထား

ဒီတစ်ခါကြုံရတဲ့မုန်တိုင်းက တော်တော်ဆိုးတာပဲ။

ဖိုးနိုင်တို့တံငါတွေ တော်တော်ထိလိုက်တယ်။

ဖိုးနိုင်ကတော့ ပိုက်တွေဆုံး၊ လှေလည်းဆုံးနဲ့

လူမသေတာတောင် ကံကောင်း။

သူနဲ့မလှမ်းမကမ်းမှာ ပိုက်ချနေတဲ့ ဦးလူလှကြီးတော့

ဘယ်လိုနေတယ်မသိဘူး။

မုန်တိုင်းကျခါစမှာ တစ်ယောက်နဲ့တစ်ယောက်

ဖေးဖေးမမနဲ့ ကူညီညာလုပ်ကြမယ်စိတ်ကူးတာ

တဖြည်းဖြည်းနဲ့ ပိုဆိုးလာတဲ့မုန်တိုင်းဟာ ပင်လယ်တပြင်လုံး

အုံကြွပြီး.. ကောင်းကင်တစ်ခုလုံးလည်း မှုန်မှိုင်းသွားလို့

ဘာမှ မမြင်ရတော့ဘူး။

ဖိုးနိုင်လည်း ကိုယ့်အသက်ဘေးကိုယ် ကာကွယ်ရင်းနဲ့

မုန်တိုင်းထန်ထန်ကြားမှာ ပင်လယ်ထဲ လက်ပစ်ကူးခဲ့ရတယ်။

ရရာသစ်တုံးတစ်တုံးကို တွယ်ဖက်ပြီး ဘာမျှမမြင်ရတဲ့

ပင်လယ်ပြင်ထဲမှာ မျောပါခဲ့ရတယ်။

ကြာတော့… လှိုင်းအပုတ်ကြမ်းလိုက်တာမှာ

တွယ်ထားတဲ့သစ်တုံးနဲ့ကိုယ်နဲ့ ကွဲကွာသွားပါတော့တယ်။

ဒီတော့လည်း.. ကမ်းစပ်ဘယ်မှာရှိမှန်း မမှန်းဆနိုင်ပဲနဲ့

ဆက်ပြီး လက်ပစ်ကူးခဲ့ရပြန်တာပေါ့။

x x x x x

ဒုက္ခတွင်းထဲမှာ `အမေ… အမေ´နဲ့ အမေ့ကိုဟစ်အော်ခေါ်ရင်း

တမ်းတမိတယ်။ ဘုရားကိုသတိရပေမယ့် နဂိုကတည်းက

ဘုရားစာတစ်ပိုဒ်ဆုံးအောင် ကောင်းကောင်းမရခဲ့တာမို့

မရွတ်ဆိုနိုင်ခဲ့ဘူး။ အမေကိုပဲ တမ်းတမိတယ်။

ကူးရင်းခတ်ရင်းက လက်ပန်းကျ၊ ပါးစပ်ထဲ ဆားငန်ရည်တွေဝင်

မျက်လုံးတွေလည်းစပ်နဲ့ မုန်တိုင်းအန္တရာယ်ကို အားခဲခံရင်း

သတိလက်လွတ်ဖြစ်သွားခဲ့ပါတော့တယ်။

အခု.. သတိရလို့ ကြည့်လိုက်တော့…

သူ့ခန္ဓာကိုယ်ဟာ ပင်လယ်ကမ်းစပ်တစ်နေရာမှာ

တင်နေတာကို တွေ့လိုက်ရပါတယ်။

x x x x x

မုန်တိုင်းအရိပ်အယောင်လည်း မရှိတော့ဘူး။

ကောင်းကင်တစ်ပြင်လုံးလည်း ကြည်လင်လို့။

ဖိုးနိုင် သဲပြင်ပေါ်ကနေ လူးလဲထလိုက်တယ်။

သူ့ကိုယ်ပေါ်မှာတော့ သဲတွေဟာ ခြောက်ကပ်ပြီး ခဲနေကြတယ်။

သူ ဘယ်လောက်ကြာကြာ သတိလစ်နေတာလဲ မသိဘူး။

သူ့ကိုယ်ပေါ်မှာ ဂဏန်းကောင်သေးသေးလေးတွေ တက်လို့။

ဖိုးနိုင်ထလိုက်ချိန်မှာ.. ဂဏန်းကောင်လေးတွေဟာ

အနီးကသဲကျွင်းလေးတွေထဲကို ပြေးဝင်သွားကြတယ်။

ဖိုးနိုင်ဟာ ထထိုင်ရင်းက ပတ်ဝန်းကျင်ကို အကဲခတ်လိုက်တယ်။

ဖိုးနိုင် သိပ်ကံကောင်းတာပဲ။ သူရောက်နေတဲ့ ပင်လယ်ကမ်းစပ်ဟာ

သူနဲ့မစိမ်းတဲ့ နေရာဖြစ်နေတယ်။ သူတို့ရွာနဲ့မဝေးတဲ့ ကမ်းနီရွာနဲ့

မလှမ်းမကမ်းက သဲပြင်ကမ်းစပ်ပေါ်မှာ ရောက်နေတာပါ။

ဖိုးနိုင်ဟာ ပင်လယ်ထဲငါးဖမ်းထွက်တိုင်း ဒီနေရာကနေ

ဖြတ်သွားနေကျမို့ ကမ်းနီရွာရဲ့ရှုခင်းကို မှတ်မိနေတယ်။

ဒီကနေ တစ်ခေါ်လောက်လျှောက်လိုက်ရင်

ကမ်းနီရွာကိုရောက်ပြီ။ ကမ်းနီရွာနဲ့ ဖိုးနိုင်တို့ရွာ ရေပြာစမ်းက

လမ်းသာပါတယ်။ မြေလမ်းပြန့်ပြန့်ပြူးပြူးရှိတယ်။

သုံးမိုင်လောက်ပဲဝေးတယ်။

ဖိုးနိုင်ဟာ မုန်တိုင်းထဲမှာ မသေမပျောက်ပဲ

ကိုယ့်ရွာနဲ့ မလှမ်းမကမ်းကိုပြန်ရောက်လာလို့ ၀မ်းသာနေတယ်။

သူ့ကိုယ်သူ ငုံ့ကြည့်လိုက်တော့ သူ့ကိုယ်ပေါ်မှာ ဒူးဆစ်လောက်

အထိရှိတဲ့ သရီးကွာတားဘောင်းဘီရယ်၊ တီရှပ်လက်ပြတ်ရယ်ဟာ

ဒီအတိုင်းရှိနေတုန်းပဲ။ ခပ်ကျပ်ကျပ်အ၀တ်အစားတွေမို့

ကျွတ်ထွက်မသွားတာပါ။

ဖိုးနိုင်က ဆံပင်ကြားထဲဝင်နေတဲ့ သဲတွေကို လက်နဲ့သပ်

ခေါင်းယမ်းခါချလုပ်လိုက်ပြီး ကမ်းနီရွာဖက်ကို

လမ်းလျှောက်လာခဲ့ပါတယ်။

x x x x x

ကမ်းနီရွာထိပ်ရောက်တော့.. ရွာထိပ်ကကွမ်းယာဆိုင်ရှေ့မှာ

ဦးဘဇံကြီးရဲ့မြင်းလှည်း ရပ်ထားတာ တွေ့လိုက်ရတယ်။

ဦးဘဇံကြီးက ကွမ်းယာဝင်ဝယ်နေတာပါ။

ဖိုးနိုင်ဟာ ကွမ်းယာဆိုင်နဲ့ မလှမ်းမကမ်းက

သစ်ပင်တစ်ပင်အောက်မှာ ရပ်လိုက်တယ်။

ဦးဘဇံကြီးမြင်းလှည်းက တောင်ဖက်ကို ဦးလှည့်ထားတာပါ။

ဒါဆိုရင် သေချာပြီ။ ဦးဘဇံကြီး ဖိုးနိုင်တို့ရွာ ရေပြာစမ်းကို

သွားမလို့ပဲ။ တောင်ဖက်မှာ ဖိုးနိုင်တို့ ရေပြာစမ်းရွာ

တစ်ရွာပဲ ရှိတာလေ။

ဦးဘဇံကြီးမြင်းလှည်းပေါ်မှာတော့ လူသေအခေါင်းတစ်ခု

တင်ထားလို့ပါ။ မြင်းလှည်းက အမိုးမပါဘူး။ လူသေထည့်တဲ့

အခေါင်းကြီးက မြင်းလှည်းပေါ်မှာ ထင်းထင်းကြီးပေါ်လို့။

ဦးဘဇံက အခေါင်းလုပ်ရောင်းတဲ့ လက်သမားဆရာကြီးလေ။

မြင်းလှည်းပေါ်ကအခေါင်းကလည်း လောလောလတ်လတ်

သေသူတစ်ယောက်အတွက် အသုဘချဖို့ မှာထားတဲ့ အခေါင်းပါ။

ဦးဘဇံဟာ ဒီလိုပဲ သူလုပ်ပေးရတဲ့အခေါင်းတွေကို

ကိုယ်ပိုင်မြင်းလှည်းနဲ့ အသုဘအိမ်အရောက် ပို့ပေးနေကျလေ။

ဒီအနီးအနားက ရွာတွေကလည်း လူသေရင်

ဦးဘဇံဆီမှာပဲ အခေါင်းမှာနေကျပါ။

အခုလည်း ရေပြာစမ်းရွာက တစ်ယောက်ယောက်သေလို့

အခေါင်းသွားပို့မလို့ဖြစ်မှာပေါ့။

x x x x x

`အဘိုးကြီး၊ တော့်မသာရထားကြီးကို ဆိုင်ရှေ့မှာ တည့်တည့်

လာမရပ်ပါနဲ့ဆိုတာ ပြောလို့မရဘူး၊ ရပ်ပြန်ပြီ´

ကွမ်းယာဆိုင်ရှင်ကောင်မလေးက ဦးဘဇံကြီးကို ရန်တွေ့နေတာပါ။

ဦးဘဇံကြီးကတော့ ကွမ်းချေးတက်နေတဲ့ သွားမည်းမည်းကြီးတွေ

ပေါ်အောင် ရယ်နေတယ်။

`ဟ- ငါ့လှည်းက မသာရထားမဟုတ်ပါဘူးဟ၊ မသာအလောင်း

တွေကို ငါ့လှည်းပေါ် မတင်ပါဘူး၊ ငါတင်လာတဲ့အခေါင်းတွေက

သစ်အကောင်းစားနဲ့လုပ်ထားတဲ့ အသစ်စက်စက်အခေါင်းတွေ၊

လူသေတွေ မ၀င်ရသေးဘူး´

`ဘာပဲဖြစ်ဖြစ်.. မသာပစ္စည်းဆို ကျက်သရေတုံးတာပဲ၊  ရော့-ရော့-

မြန်မြန်မောင်းသွားပါတော့၊ နောက်လာရင်  တော့်မသာရထားကြီးကို

ကျွန်မဆိုင်နဲ့ ခပ်လှမ်းလှမ်းမှာ ရပ်နော်၊ ဒါပဲ´

ကောင်မလေးက ဦးဘဇံအတွက် ကွမ်းဗူးကိုလှမ်းပေးရင်းက

ပြောလိုက်တယ်။ ဦးဘဇံက စီးကရက်ထည့်တဲ့ သံဗူးအ၀ိုင်းလေးကို

ဆောင်ထားပြီး ကွမ်းယာဝယ်ရင် အဲဒီအထဲကို ယာပြီး

ထည့်ခိုင်းပါတယ်။ စားတော့လည်း ဗူးလေးကိုဖွင့်ဖွင့်ပြီး

တစ်ယာပြီးတစ်ယာ စားတတ်တာပါ။

ဦးဘဇံက ကွမ်းယာသည်ကောင်မလေးပြောတာကို

စိတ်မဆိုးပဲ တဟားဟားရယ်ရင်းက အခေါင်းတင်ထားတဲ့

သူ့မြင်းလှည်းပေါ်ကို တက်လိုက်တယ်။

ဦးဘဇံက ပျော်တတ်တဲ့လူကြီးပါ။

x x x x x

အစကတော့… ဖိုးနိုင်ဟာ ဦးဘဇံကြီးဆီမှာ ခွင့်တောင်းပြီး

ရွာကိုလိုက်မလို့ပဲ။ ကွမ်းယာသည်ကောင်မလေး ရန်တွေ့တာကို

စိတ်မဆိုးပဲ ရယ်မောနေတာတွေ့လိုက်တော့

ပျော်တတ်တဲ့ဦးဘဇံကြီးကို စချင်နောက်ချင်စိတ်ပေါက်လာတယ်။

သူရပ်နေတဲ့ သစ်ပင်ကြီးဖက်ကို ဦးဘဇံမြင်းလှည်းလည်း

မောင်းထွက်လာရော… ဖိုးနိုင်က သစ်ပင်တစ်ဖက်ကိုကွယ်ပြီး

ရပ်နေလိုက်တယ်။ မြင်းလှည်း သစ်ပင်ကိုကျော်သွားမှ

နောက်ကပြေးလိုက်ပြီး… မြင်းလှည်းနောက်မြီးကနေ

လှည်းပေါ်ကို ခုန်တက်လိုက်တယ်။

x x x x x

ဖိုးနိုင်မြင်းလှည်းပေါ်လိုက်လာတာကို ဦးဘဇံကြီး မသိသေးပါဘူး။

ကွမ်းယာကို ပါးစောင်မှာမြုံရင်း မြင်းမလေးကို ကြာပွတ်နဲ့

တရွှမ်းရွှမ်းရိုက်ပြီး ရေပြာစမ်းရွာဆီကို ခရီးနှင်နေတယ်။

ဖိုးနိုင်လည်း လမ်းကျမှ အဘိုးကြီးကို စဦးနောက်ဦးမယ်ဆိုတဲ့

အတွေးနဲ့ တိတ်တိတ်ကလေး လိုက်လာခဲ့တယ်။

မြင်းလှည်းနောက်မှာ အခေါင်းကြီးတင်လာရလို့

နေရာလပ်က  သိပ်မရှိပါဘူး။ ဖိုးနိုင်လည်း အခေါင်းပေါ်ကိုပဲ

တက်ထိုင်လိုက်ပါတော့တယ်။

မြေလမ်းလေးမှာ လေတဟူးဟူးနဲ့မို့ သွားရတာ စိတ်ရွှင်လန်းလာတယ်။

ဦးဘဇံကြီးကတော့ သူ့မြင်းလှည်းနောက်မှာ ဖိုးနိုင်ပါလာတာ မသိပဲ

ကွမ်းလေးကို တမြုံမြုံဝါးရင်း ကြာပွတ်ကြီးတယမ်းယမ်းနဲ့

ခရီးဆက်နေပါတယ်။ တစ်ချက်တစ်ချက်လည်း လှည်းအပြင်ကို

ခေါင်းပြူပြီး ကွမ်းတံတွေး ထွေးပါသေးတယ်။

x x x x x

ဖိုးနိုင်ဟာ သေတွင်းကလွတ်လာပေမယ့် လွတ်လွတ်လပ်လပ်တော့

မပျော်နိုင်ရှာဘူး။ သူ့မှာ လှေမရှိတော့ဘူး။ ပိုက်မရှိတော့ဘူး။

ပင်လယ်ပြင်ကိုငါးဖမ်းထွက်ဖို့ လှေနဲ့ပိုက် ရှာရဦးမယ်။

တံငါသည်တစ်ယောက်အတွက် လှေနဲ့ပိုက်ဟာ

မရှိမဖြစ်ပစ္စည်းတွေမဟုတ်လား။

ဘာပဲဖြစ်ဖြစ် လူကြံရင် ဘာမဖြစ်စရာရှိသလဲ၊ မသကာ…

အကြွေးတင်ရုံပေါ့။ အလုပ်ကြိုးစားပြီး အကြွေးကို

မြန်မြန်ဆပ်နိုင်အောင် လုပ်ရုံပါပဲ။

ဖိုးနိုင်က ဖြေတွေးတွေးလိုက်တယ်။

ဖိုးနိုင်အာရုံထဲမှာ အမေ့ပုံရိပ်ပေါ်လာပြန်တယ်။

အမေကတော့.. ပင်လယ်ထဲမှာ မုန်တိုင်းကျပြီး

သူပြန်ရောက်မလာသေးလို့ စိတ်ပူနေမှာ အမှန်ပဲ။

ဖိုးနိုင်က အမေ့ရဲ့တစ်ဦးတည်းသောသားပါ။

အမေက မုဆိုးမ။ အမေတစ်ခု သားတစ်ခုဆိုတော့

တစ်ယောက်နဲ့တစ်ယောက် သိပ်ချစ်ကြတဲ့ သားအမိပါ။

မုန်တိုင်းကြားမှာမသေပဲ သူပြန်ရောက်လာတာတွေ့ရင်

အမေ ဘယ်လောက်များ ၀မ်းသာလိုက်မလဲ။

ဖိုးနိုင်က တွေးရင်း အိမ်အမြန်ပြန်ရောက်ချင်စိတ်တွေပေါ်လာတယ်။

ရှေ့ကိုမျှော်ကြည့်လိုက်တော့.. သူတို့ရွာလေးနဲ့ နီးလာပြီ။

ဦးဘဇံကြီးက ပါးစပ်ထဲကကွမ်းသွေးတွေကို

လှည်းအပြင်ရောက်အောင် ထွေးထုတ်လိုက်တယ်။

နောက်တစ်ယာထပ်ဝါးဖို့ သူ့ကွမ်းဗူးလေးကို ဖွင့်တယ်။

ဦးဘဇံကြီးကိုနောက်ဖို့ အချိန်တန်ပြီလို့ ဖိုးနိုင်ကတွေးလိုက်တယ်။

ရွာလည်း ရောက်ခါနီးပြီလေ။

x x x x x

ဦးဘဇံကြီး ကွမ်းဗူးကိုအဖွင့်မှာ ဖိုးနိုင်က ဦးဘဇံချိုင်းအောက်ကနေ

သူ့လက်ကို အသာလျှိုပြီး ကွမ်းတစ်ယာကိုလှမ်းနှိုက်လိုက်ပါတယ်။

ကွမ်းတစ်ယာက သူ့လက်ထဲပါလာတယ်။

ဦးဘဇံကြီးဟာ ကွမ်းဗူးထဲကနေ သူ့မျက်စိအောက်မှာ

ကွမ်းတစ်ယာ ဖြတ်ကနဲပျောက်သွားတာကို ကြည့်ပြီး

အံ့သြနေတယ်။

ဦးဘဇံကြီးဟာ ကွမ်းတစ်ယာ ပါးစပ်ထဲထည့်ဝါးရင်းက

ရေရွတ်လိုက်တယ်။

`တယ်- နေ့ခင်းကြောင်တောင်ကြီး သောင်းကျန်းနေလိုက်တာ

ဘယ်က အကောင်ပါလိမ့်´

အဲဒီလိုပြောပြီး.. ဦးဘဇံကြီးက….

`ကိုင်းကွာ- သောင်းကျန်းဦးဟဲ့၊ နာနာဘာဝကောင်´

သူကိုင်ထားတဲ့ကြာပွတ်နဲ့ နောက်ဖက်ကို လှမ်းရိုက်လိုက်ပါတယ်။

ဦးဘဇံကြီးက လူ နောက်ကိုမလှည့်ပဲ ကြာပွတ်ကိုပဲ

နောက်ပြန် ယမ်းထည့်လိုက်တာပါ။

ရုတ်တရက်ဆိုတော့ ဖိုးနိုင် ရှောင်ချိန်မရလိုက်ဘူး။

ဦးဘဇံ ယမ်းလိုက်တဲ့ကြာပွတ်ဟာ

ဖိုးနိုင်ကိုယ်ပေါ်ကို တည့်တည့်ကျလာတယ်။

ဒါပေမယ့်…. ဒါပေမယ့်…..

ကြာပွတ်ဟာ ဖိုးနိုင်ကိုယ်ထဲကို ၀င်ရောက်ဖြတ်သန်း

သွားပါတယ်။ ကြာပွတ်ဟာ ဖိုးနိုင်ကိုယ်ထဲကို

ဒိုးယိုပေါက်ဖြတ်သန်းသွားပြီးတဲ့နောက်မှာ…

ဖိုးနိုင်ရဲ့ကိုယ်ဟာ ကြာပွတ်ဖြတ်သွားတဲ့အရာအတိုင်း

နှစ်ခြမ်းကွဲထွက်သွားပါတယ်။

ဖိုးနိုင်ဟာ နှစ်ခြမ်းကွဲသွားတဲ့ သူ့ကိုယ်သူ ငုံ့ကြည့်ရင်း

အံ့အားသင့်နေတယ်။ သူ့ခန္ဓာကိုယ်ဟာ နှစ်ခြမ်းကွဲရက်ကြီးနဲ့

လေထဲမှာ ဟစိ..ဟစိ ဖြစ်နေသေးတယ်။

ကြည့်နေရင်းမှာပဲ…

နှစ်ခြမ်းကွဲနေတဲ့ ခန္ဓာကိုယ်ဟာ တဖြည်းဖြည်းနဲ့

ပြန်စေ့ပိတ်ပြီး ဆက်သွားပါတော့တယ်။

ဟင်… ဘာလဲ၊ ဘာလို့ အဲဒီလိုဖြစ်ရတာလဲ။

ငါ ဘာလို့ ဒီလိုဖြစ်ရတာလဲ။

`ဦးကြီး… ဦးကြီး´

ဖိုးနိုင်ဟာ သူ့အဖြစ်ကိုမေးကြည့်ဖို့ ဦးဘဇံကိုခေါ်လိုက်တယ်။

ဦးဘဇံက ဖိုးနိုင်ခေါ်သံကို မကြားဘူး။

ဖိုးနိုင်က စိတ်မရှည်တော့ပဲ ဦးဘဇံပခုံးကို လှမ်းပုတ်ပြီး

ခေါ်လိုက်ပြန်တယ်။

`ဦးကြီး´

ပခုံးကိုပုတ်လိုက်တဲ့ သူ့လက်ဟာ ဦးဘဇံပခုံးကို မထိပဲ

သူ့လက်က ဦးဘဇံကိုယ်ထဲကို ကျွံဝင်သွားပါတယ်။

`ဟင်…´

x x x x x

ဖိုးနိုင်နားလည်လိုက်ပါပြီ။

ဖိုးနိုင်ဟာ မုန်တိုင်းထဲကနေ မသေပဲလွတ်မြောက်လာတယ်လို့

သူ့ကိုယ်သူ ထင်နေတယ်။

တကယ်တော့… လက်ရှိ ``သူ´´ဟာ

အကောင်အထည် ရုပ်ဒြပ်မရှိတဲ့ ၀ိညာဉ်ပါလား….။

ဖိုးနိုင်ဟာ သူတက်ထိုင်နေတဲ့အခေါင်းကြီးကို

ခုမှ.. ငုံ့ကြည့်လိုက်ပါတယ်။

အခေါင်းဘေးနံရံမှာရေးထားတဲ့စာတန်းကို

တွေ့လိုက်ရပါပြီ။

                           မောင်နိုင်

                       အသက်(၂၄)နှစ်

ဟာ… ငါသေသွားပြီ။ ငါသေသွားပါပြီလား။

သူ့ကိုယ်သူ သေပြီဆိုတာကို ၀မ်းပန်းတနည်း သိလိုက်ချိန်မှာပဲ…

ဦးဘဇံရဲ့မြင်းလှည်းဟာ ရွာထဲရောက်လာပြီး …..

ရွာထိပ်နားက အခေါင်းမှာထားတဲ့အိမ်ရှေ့မှာ ရပ်လိုက်ပါတယ်။

အဲဒီအိမ်ကတော့…. ဖိုးနိုင်တို့အိမ် ပါပဲ။

x x x x x

ဖိုးနိုင်ဟာမြင်းလှည်းပေါ်ကဆင်းလိုက်တယ်။

အိမ်ထဲကို အပြေးအလွှားဝင်လာခဲ့တယ်။

အိမ်ရှေ့မှာတော့… အလောင်းစင်တစ်ခုပြင်ဆင်ထားပြီး…

သူ့အမေက ငိုယိုလို့။

ရွာထဲက မိန်းမတချို့က သူ့အမေကို ဖေးမနှစ်သိမ့်နေတဲ့

မြင်ကွင်းကို မြင်လိုက်ရပါတော့တယ်။

အလောင်းစင်ပေါ်ကအလောင်းကတော့….

သူ့အလောင်းပါပဲ။

အလောင်းဟာ ပုပ်ပွပြီး ဖောင်းကားလို့

ရုပ်လုံးမပေါ်တော့ပါဘူး။

ရေထဲမှာသေတဲ့အလောင်းတို့ ထုံးစံအတိုင်း

သုံးရက်အကြာမှာ ပေါ်လာလို့ အိမ်ကိုပြန်သယ်လာတဲ့

ဖိုးနိုင်ရဲ့အလောင်းပါပဲ။

`ဟော- အခေါင်းရောက်လာပြီ´

ဦးဘဇံမြင်းလှည်းရောက်လာတာကိုကြည့်ပြီး

တစ်ယောက်က ပြောလိုက်တယ်။

`အမလေး… ငါ့သားလေးနဲ့ ခွဲရတော့မယ်၊ သား.. သားလေး..

ဖိုးနိုင်၊ အဖြစ်ဆိုးလှချည်လား သားရဲ့၊ အမေ့ကို

တစ်ယောက်တည်း ထားခဲ့ပြီလား၊ အမေကို စွန့်စွန့်စားစား

ရှာကျွေးတဲ့ သားလိမ္မာလေး၊ အဖြစ်ဆိုးလှတယ်၊

အမလေး… သားရဲ့´

ဖိုးနိုင်အမေဒေါ်လှမြိုင်က ဖွဲ့ဖွဲ့နွဲ့နွဲ့ငိုလိုက်တယ်။

`အမေ.. အမေ.. သားဒီမှာပါ၊ အမေ့ဘေးမှာ ရပ်နေတယ်အမေ´

ဖိုးနိုင်ကပြောလိုက်ပေမယ့် အမေသာမက…

ဘယ်သူမျှ ဖိုးနိုင်ကို မမြင်ကြပါဘူး။

`ကဲ- ကဲ- အလောင်းကို အခေါင်းထဲထည့်ကြ၊

အလောင်းက မြင်မကောင်းတော့ဘူး၊ သရဏဂုံလည်း

တင်ပြီးနေပြီ၊ အခေါင်းထဲထည့်ပြီး တစ်ခါတည်း

သံရိုက်ပြီး ပိတ်လိုက်ကြ´

ရွာလူကြီးတစ်ယောက်က ဆော်သြလိုက်တာပါ။

`ကျွန်မသားလေး.. ကျွန်မသားလေးကို ၀အောင်ကြည့်ပါရစေဦး´

`အမေ.. အမေ.. ကျွန်တော် အမေ့ဘေးမှာ..´

`မလှမြိုင်ကို ၀ိုင်းထိန်းထားကြစမ်း´

ရွာသားတချို့က ဖိုးနိုင်အလောင်းကိုဝိုင်းမပြီး

အခေါင်းထဲသွင်းလိုက်ကြပါတယ်။

အလောင်းက ပုပ်ပွနေလို့ အခေါင်းနဲ့ ကြပ်ပြီး

ဝင်အောင် မနည်းဖိထည့်လိုက်ရတယ်။

အခေါင်းထဲကို အလောင်းရောက်သွားတာနဲ့…

ဖိုးနိုင်အမြင်တွေဟာေ၀၀ါးသွားပါတယ်။

ကြားနေရတဲ့အသံတွေလည်း တိုးသွားပါတယ်။

`သံနဲ့အသေရိုက်ပြီး ပိတ်လိုက်တော့ဟေ့´

အလောင်း အခေါင်းထဲရောက်သွားတာနဲ့

အဖုံးပျဉ်ပြားနဲ့ ဖုံးလိုက်ကြတယ်။

ဦးဘဇံကိုယ်တိုင် အခေါင်းအဖုံးကို သံနဲ့ရိုက်ပေးတယ်။

သံတစ်ချက် ရိုက်သွင်းလိုက်တိုင်း….

ဖိုးနိုင်မြင်နေရတဲ့ပတ်ဝန်းကျင်ဟာေ၀၀ါးသွားတယ်။

နောက်ဆုံးသံချက် ရိုက်လိုက်ချိန်မှာတော့….

ဖိုးနိုင်ဟာ ဘာကိုမျှ မမြင်ရ… မကြားရတော့ပဲ….

ပိန်းပိတ်အောင်နက်ရှိုင်းတဲ့ အမှောင်ထုကြီးထဲကို

ရောက်ရှိသွားပါတော့တယ်။

x x x x x

ဆောင်းလုလင်